ब्रेकिंग : प्राणप्रतिष्ठा सोहळ्याच्या पूर्वसंध्येला रावेर मध्ये दगडफेक
रावेर-म,मंडे टू मंडे न्युज नेटवर्क।उद्या अयोध्या येथे रामलल्लाचा भव्य प्राणप्रतिष्ठा सोहळा होत आहे. याचे औचित्य साधून आज रावेर शहरात प्रभू श्रीरामाच्या मूर्तीची भव्य शोभायात्रा काढण्यात आली, शोभायात्रा शहरातील भोईवाडा परिसरातून पुढे निघून नाला भागात येत असतांना या शोभायात्रेवर दगडफेक करण्यात आली, अचानक झालेल्या दगडफेकीमुळे गोंधळ उडाला,पोलिसांनी लागलीच हस्तक्षेप करत परिस्थिती नियंत्रणात आणली.
या बाबत मिळालेली अधिक माहिती अशी की, उद्या अयोध्या येथे श्रीराम मंदिरात श्रीरामाची प्राणप्रतिष्ठा सोहळा होत आहे. या निमित्त देश भरात अनेक कार्यक्रमांचे आयोजन केले जात असून रावेर शहरातही आज प्रभू श्रीरामाच्या मूर्तीची भव्य शोभायात्रा काढण्यात आली. थोडा वेळापूर्वीच ग्रामविकास मंत्री ना. गिरीश महाजन यांनी या शोभायात्रेला भेट देऊन त्यांनी पूजनही केले.
या नंतर रात्री आठ -साडेआठ वाजेच्या सुमारास ही शोभायात्रा भोईवाडा परिसरातून पुढे निघून नाला भागात येत असतांना काही अज्ञातांनी शोभायात्रेवर जोरदार दगडफेक सुरू केली. अचानक झालेल्या दगडफेकी मुळे शोभायात्रेत गोंधळाचे वातावरण निर्माण झाले.पोलिसांकडून दगडफेक करणार्‍यांचा शोध सुरू असून शोभायात्रा मात्र थांबविण्यात आली आहे. परिसरात कडेकोट बंदोबस्त लावण्यात आलेला असून परिस्थिती नियंत्रणात आहे. कोणीही अफवांवर विश्वास ठेवू नये असे आवाहन पोलीस प्रशासनाकडून करण्यात आले आहे.
