धक्कादायक! कनेक्शन उघड, प्लाझ्माविक्रीचाही गोरखधंदा !
मुंबई (विशेष प्रतिनिधी) : कोरोना रुग्णांवर उपचारासाठी प्लाझ्मा थेरपीचा वापर मदतगार ठरत असला, तरीही राज्यात या थेरपीसाठी अद्याप ठोस नियमावली जाहीर झालेली नाही. त्यामुळे प्लाझ्माचीही विक्री केली जात असल्याचे धक्कादायक प्रकार समोर आले आहेत. दिल्लीमध्ये सुरू झालेल्या प्लाझ्मा विक्रीच्या गैरप्रकारांना पाय फुटले असून पैसे मोजण्याची तयारी असेल, तर प्लाझ्मा देणारे दाते दिल्लीहून मुंबईलाही पाठवण्यात येत असल्याचे समोर आले आहे. या प्लाझ्मासाठी ऐंशी हजार रुपये दर आकारणी केली जाते. प्रवासाचा खर्च प्लाझ्मा हवा असलेल्या व्यक्तीला करावा लागतो. करोनामुक्त झालेल्या काही बेरोजगार तरुणांनी प्लाझ्मा विकण्याचा मार्ग स्वीकारल्याची धक्कादायक माहिती समोर आली आहे.
एका वृत्तसंस्थेने दिलेल्या वृत्तानुसार अश्या प्रकारे प्लाझ्मा ची विक्री करणाऱ्या तरुणांकडून या संदर्भात मिळालेल्या माहिती नुसार, गाडी पाठवण्याची किंवा प्रवासखर्च देण्याची तयारी असेल, तर मुंबईला दाता पाठवण्यात येईल, असे सांगितले गेले प्लाझ्मादान करणारा तरुण हा करोनामुक्त असून तो प्लाझ्मा देण्यासाठी योग्य असल्याची खातरजमा करणारे वैद्यकीय चाचण्यांचे अहवालही त्याने सदर वृत्तसंस्थेस पाठवले आहे.
कोरोना झालेल्या या तरुणाला दिल्लीमध्ये क्वारंटाइन केंद्रामध्ये ठेवण्यात आले होते. तिथे त्याची ओळख कोरोनातून बरे झालेल्या इतर तरुणांशी झाली. कोरोनामुक्त झाल्यानंतर वेगवेगळ्या रक्तगटाचे हे तरुण एकमेकांच्या संपर्कात होते. रुग्णालयांमधून प्लाझ्मासाठी दोन ते तीन लाख रुपयांची मागणी केली जाते, पैसे कमी करून मागितले तर दाता आणण्यास सांगितले जाते. त्यामुळे या तरुणांनी प्लाझ्मादान करुन त्यातून पैसे कमावण्याचा मार्ग स्वीकारला.
प्लाझ्मादान करण्यासाठी तयार असलेल्या तरुणाला १७ एप्रिल रोजी कोरोना झाला होता, त्यानंतर तो २३ दिवस क्वारंटाइनमध्ये राहिला. १८ मे रोजी त्याने पुन्हा केलेल्या चाचणीमध्ये तो निगेटिव्ह आला आहे. मुंबईमध्ये वांद्रे येथील रुग्णालयामध्ये जून महिन्यामध्ये या दात्याने प्लाझ्मा दान केला होता. त्यासाठी ८० हजार रुपये घेण्यात आले. ए, बी, ओ रक्तगट दुर्मिळ असल्यामुळे रुग्णालयामध्ये साडेतीन लाख रुपये घेतात. हा दाता ३१ वर्षाचा आहे. प्लाझ्मा देण्यापूर्वी सीबीसीच्या चाचण्या करून प्लेटलेटनुसार प्लाझ्माची क्षमता तपासून पाहिली जाते. त्याचेही अहवाल त्याने व्हॉटस्अॅपवर पाठवले आहेत.
सदरील वृत्तसंस्थेने जेव्हा त्याच्याकडे विचारणा केली, तेव्हा कोरोना संसर्गामुळे पैसे संपले, घर चालवण्यासाठी ज्या तरुणांकडे काहीच मार्ग नाही, ते दाते म्हणून प्लाझ्मा विकत असल्याचे त्याने सांगितले. या तरुणाने स्वतः पाच ते सहा वेळा प्लाझ्मा मोफत दिला आहे. मात्र इतरांच्या शरीरातून प्लाझ्मा काढतात, त्यांनाही मोफत द्या, असे आपण सांगू शकत नाही, असे तो म्हणाला. अनेक तरुणांच्या नोकऱ्या गेल्या आहेत, खाण्यापिण्याचेही हाल आहेत. त्यामुळे कोरोनातून मुक्त झालेल्यांना असा आर्थिक आधार मिळत आहे, असे सांगत कोरोना रुग्णांना मदत करण्याच्या उद्देशाने हे काम सुरू केल्याचा दावा त्याने केला. रुग्णालयेही प्लाझ्मा थेरपीसाठी पैसे घेतात, त्यांची हाव वाढत चालली आहे, याबद्दल त्याने नाराजी व्यक्त केली.
सदरील वृत्त दिलेल्या वृत्तसंस्थेने याला आळा घालन्याची मागणी केली आहे.
कोरोनाकाळात अनेक वैद्यकीय गैरप्रकार सुरू असल्याचे विविध बातम्यांमधून दिसते. त्यात रेमडेसिवीरसारख्या औषधाची पाच पट दराने विक्री होत असल्याचेही सांगितले जाते. ‘प्लाझ्मा थेरपी’ हा सध्या परवलीचा शब्द झाला असून यासंदर्भात वैद्यकीय निकष जारी केले गेले असले, तरीही त्यातील व्यवहाराच्या मुद्द्यांवर स्पष्ट नियमावली हवी. खासगी व सार्वजनिक वैद्यकीय यंत्रणासाठी हे सुस्पष्ट होणे गरजेचे आहे.’सदरील वृत्तसंस्थेच्या’ हाती लागलेली केस हा अशा प्रकारच्या रॅकेटचा केवळ छोटासा हिस्सा असू शकतो. सरकारने या संबंधी ठोस पावले उचलण्याची गरज आहे.
बातम्यांच्या अपडेट मिळवण्यासाठी आम्हाला फॉलो करा
