धक्कादायक! कोरोना फैलावणाऱ्या चीनला मुंबईने टाकले मागे; रुग्णसंख्या आणि मृतांचा आकडाही मोठा
मुंबई: करोनाबाबतची एक धक्कादायक आकडेवारी समोर आली आहे. जगभर करोनाचा फैलाव होण्यास कारणीभूत ठरलेल्या चीनलाही मुंबईने करोनाच्या संख्येबाबत मागे टाकल्याची धक्कादायक माहिती समोर आली आहे. मुंबईतील करोना रुग्णांची संख्या आणि मृतांची आकडेवारी चीनपेक्षाही अधिक असल्याची माहिती समोर आल्याने आरोग्य यंत्रणेच्या तोंडचं पाणी पळालं आहे. करोना रुग्ण संख्येच्या बाबतीत मुंबईने करोना फैलावणाऱ्या चीनलाही मागे टाकले आहे. या आधी मुंबईने करोना रुग्णांच्या संख्येमध्ये चीनच्या वुहान शहरालाही मागे टाकले होते. महाराष्ट्र टाईम्स ने दिलेल्या वृत्तानुसार आता अख्ख्या चीनपेक्षाही मुंबईत सर्वाधिक रुग्ण सापडले आहेत. त्यामुळे आरोग्य यंत्रणेची डोकेदुखी वाढली आहे.
चीनमध्ये सध्या ८५ हजार ३२० करोनाबाधित आहेत. तर मुंबईत हा आकडा ८५ हजार ७२४ एवढा आहे. चीनमध्ये आतापर्यंत करोनाने ४ हजार ६४८ लोकांचा मृत्यू झाला आहे. तर मुंबईत ४ हजार ९३८ लोक करोनाने दगावले आहेत. चीनने काही दिवसांपूर्वी चीन करोनामुक्त झाल्याचं जाहीर केलं होतं. मात्र, त्यानंतरही चीनमध्ये रुग्ण आढळले होते. चीनमध्ये एकूण ५०० ते ६०० रुग्ण सक्रिय आहेत. तर मुंबईत सध्या २३ हजार ६२४ रुग्ण सक्रिय आहेत. त्यामुळे आरोग्य यंत्रणांचे धाबे दणाणले आहेत. या आधी मुंबईने करोना रुग्णांच्या संख्येमध्ये चीनच्या वुहान शहरालाही मागे टाकले होते. आता अख्ख्या चीनपेक्षाही मुंबईत सर्वाधिक रुग्ण सापडले आहेत.
मुंबईतील करोना रुग्णांची संख्या नियंत्रणात आणण्यासाठी वारंवार लॉकडाऊन करण्यात येत आहे. कॉन्टॅक्ट ट्रेसिंग, सर्व्हे, क्वॉरंटाइन सेंटरच्या संख्येत वाढ, चेस द व्हायरस सारख्या मोहिमा आदी उपाय योजना करूनही मुंबईतील करोना रुग्णांची संख्या काही कमी होताना दिसत नाही. वरळी, धारावी, भायखळा आणि अंधेरी-जोगेश्वरी परिसरात करोनाचे सर्वाधिक रुग्ण आढळले आहेत. त्यापैकी धारावीतील करोना रुग्णांच्या संख्येत नियंत्रण आले असले तरी मुंबईतील इतर भागातही मोठ्या प्रमाणावर रुग्ण आढळत असल्याने आरोग्य यंत्रणेची डोकेदुखी वाढली आहे.
दरम्यान, काल मुंबईत २८ करोनाबाधितांचा मृत्यू झाला आहे. तर काल राज्यात दिवसभरात ५ हजार ३८६ नवीन रुग्णांचे निदान झालं आहे. मुंबईत १ हजार २०० नवीन रुग्ण सापडले आहेत. मुंबईचा समावेश असलेल्या ठाणे आरोग्य मंडळात दिवसभरात ३ हजार ३६९ बाधित रुग्ण सापडले आहेत. यामुळे राज्यातील एकूण करोना बाधित रुग्णांची संख्या दोन लाख ११ हजार ९८७ इतकी झाली आहे. राज्यात ५ हजार ३८६ रुग्ण बरे होऊन घरी गेले आहेत. राज्यात कालपर्यंत एकूण एक लाख १५ हजार २६२ रुग्ण बरे झाले आहेत. यामुळे राज्यातील रुग्ण बरे होण्याचे प्रमाण ५४.३७ टक्के इतके आहे. कालपर्यंत तपासण्यात आलेल्या ११,३५,४४७ प्रयोगशाळा नमुन्यांपैकी २,११,९८७ (१८.६७ टक्के ) नमुने पॉझिटिव्ह आले आहेत. सध्या राज्यात ६,१५,२६५ व्यक्ती होमक्वारंटाईनमध्ये आहेत तर ४६,३५५ व्यक्ती संस्थात्मक क्वारंटाईनमध्ये आहेत.
