चीनला आर्थिक झटका देणार! सरकारने मागवली आयातीची विस्तृत माहिती
पूर्व लडाखमध्ये भारत-चीनमध्ये सीमेवर तणाव आहे. दिवसेंदिवस हा तणाव वाढत चालला. यामुळे चीनमधून होणारी आयात कमी करण्याचा प्रयत्न सरकारकडून सुरू झाले आहेत. भारत सरकारने उद्योगांकडून सूचना मागवल्या आहे. चीनमधून होणाऱ्या आयातीबाबत या सूचना मागवण्यात आल्या आहेत. आर्थिक स्तरावर चीनला झटका देण्याचा प्रयत्न भारताकडून सुरू झाला आहे.
नवी दिल्ली।
पूर्ल लडाखमध्ये विश्वासघात करून भारतीय जवानांवर हल्ला करणाऱ्या चीनला धडा शिकवण्यासाठी भारत सरकारकडून वेगवेगळ्या स्तरावर प्रयत्न सुरू आहेत. लष्करी आणि कूटनितीसह आर्थिक पातळीवर चीनला उत्तर देण्याची तयारी भारताने सुरू केलीय. चीनकडून आयात होणाऱ्या साहित्याची सविस्तर माहिती सरकारने मागितली आहे. चीनमधून येणारा निकृष्ट दर्जाचा माल रोखणे आणि स्वदेशी उत्पादनाला चालना देण्याचा सरकारचा उद्देश आहे. चीनवरील अवलंबित्व कमी करणं आणि आत्मनिर्भर भारताला चालना देण्याच्या उपायांवर पंतप्रधान मोदींनी अलिकडेच बैठक घेतल्याचं सूत्रांनी सा्ंगितलं.
उद्योगांकडून मागवल्या सूचना
चीनमधून आयात होणारा कच्चा माल आणि काही सामानावर सरकारने उद्योग क्षेत्राकडून सूचना मागितल्या आहेत. या सामानात मनगटी घड्याळं, भिंतीवरची घड्याळं, काचेचे रॉड्स आणि ट्यूब्स, केसांचे क्रीम, केसांचा शँपू, फेस पाउडर, आय अँड लिप मेकअप प्रिपरेशन्स, छपाईची शाई, पेंट्स आणि वॉर्निश आणि तंबाखूच्या काही उत्पादनांचा यात समावेश आहे.
याशिवाय २०१४-१५ आणि २०१८-१९ दरम्यान आयातीतील तेजीची आकडेवारी आणि भारतात बनणाऱ्या याच वस्तुंच्या किंमती, घरगुती क्षमता, मुक्त व्यापार करारानुसार होणारी आयात आणि शुल्काबाबत माहिती मागवण्यात आली आहे.
चीनमधून होणारी आयात
सरकारने मागवलेल्या माहितीवर उद्योगांकडून सूचना तयार केल्या जात आहेत. लवकरच या सूचना वाणिज्य मंत्रालयाला पाठवल्या जातील, अशी माहिती उद्योगातील एका सूत्राने दिली.
चीनशी सुरू असलेल्या तणावावरून आयात कमी करण्यासाठी सरकार प्रयत्नशील आहे. याबाबत सरकार गंभीर आहे. भारताच्या एकूण आयातीपैकी १४ टक्के वाटा हा चीनचा आहे. यात मोबाइल, टेलिकॉम, ऊर्जा, प्लास्टिकची खेळणी आणि क्रिटीकल फार्मा इनग्रीडिएंट्स या क्षेत्रात चीनचा दबदबा आहे.
चीनच्या थेट परकीय गुंतवणुकीला लगाम
सरकारने चीनमधून होणाऱ्या टायर आयातीवर बंदी घातली आहे. तसंच भारतात चीनमधून होणाऱ्या थेट परकीय गुंतवणुकीसाठी मंजुरीची अट घातली आहे. यामुळे देशातील कंपन्यांना चीनच्या अधिग्रहणापासून वाचण्याचा उद्देश आहे. यामुळे चीनमधून भारतात येणाऱ्या परकीय गुंतवणुकीला लगाम लागणार आहे. एप्रिल २०१९ ते फेब्रुवारी २०२० पर्यंत भारताने चीनमधून ६२. ४ अब्ज डॉलरची आयात केली आहे. तर भारतातून चीनला फक्त १५.५ अब्ज डॉलरची निर्यात झाली आहे.
बातम्यांच्या अपडेट मिळवण्यासाठी आम्हाला फॉलो करा
