मी राजकारणातला कुस्तीपटू, धोबीपछाडासह सर्व डावपेज आपल्याला माहिती आहे– गिरीश महाजन
चाळीसगाव (प्रतिनिधी)। सध्याच्या राजकीय पश्वभूमीवर ,मी राजकारणातील कुस्तीपटू असून धोबीपछाडसह सर्व डावपेच आपल्याला माहित असल्याचे प्रतिपादन माजी मंत्री आ. गिरीश महाजन यांनी चाळीसगाव येथील व्यायाम शाळेच्या भूमिपूजन कार्यक्रमात केले. महाजन यांच्या वक्तव्याने राजकीय वर्तुळात चर्चा चांगलीच रंगली आहे.
माजीमंत्री गिरीश महाजन यांच्या हस्ते चाळीसगावात आण्णासाहेब कोळी पैलवान व्यायाम शाळेचे भूमिपूजन करण्यात आले. याप्रसंगी खासदार उन्मेष पाटील, आमदार मंगेश चव्हाण, आमदार रमेश पाटील, माजी आमदार साहेबराव घोडे, शिवसेनेचे उपजिल्हाप्रमुख उमेश गुंजाळ, नगराध्यक्षा आशालता चव्हाण यांच्यासह पालिकेतील नगरसेवक व अन्य पदाधिकारी यांच्यासह अनेक कुस्तीपटू उपस्थित होते. या वेळी आ. गिरीश महाजन यांनी जोरदार फटकेबाजी करत राजकीय जीवनात वावरतांना कुस्ती, कबड्डीसह अनेक खेळ मी खेळलो आहे. त्यामुळे कुस्ती खेळात मी चांगलाच पारंगत आहे. राजकारणही कुस्ती सारखाच खेळ असून धोबीपछाडसह सर्व डावपेच मला माहिती आहे. मी ही राजकारणातील कुस्तीपटू असून त्या मुळे कोणाला आत घ्यायचे, कोणाला बाजूला करायचे व कोणाला बाहेर काढायचे हे आपणास चांगलेच माहीत आहे. जगातील युवा देश म्हणून भारताची ओळख आहे. परंतु देशातील युवा पिढी व्यसनांकडे वळत आहे. निरोगी शरीर हे निरोगी देशाची गरज आहे. तरुणांनी व्यसनांकडे न वळता आपला खरा पुरूषार्थ व्यायाम शाळेत दाखवावा, असे आवाहन या आमदार महाजन यांनी केले.
गिरीश महाजन यांनी केलेली टोले बाजी ही राजकीय वर्तुळात चांगलीच चर्चेचा विषय बनला असून एकनाथराव खडसे यांनी पक्षत्याग केल्यानंतर नाथाभाऊ व गिरीश महाजन हे एकमेकांना सूचक टोले मारत आहेत.
