यावल रस्त्यावर दुचाकींचा अपघात, चार जखमी
यावल (प्रतिनिधी)। यावल येथील चोपडा रस्त्यावर वन विभाग कार्यालया जवळ दोन दुचाकींचा अपघात होवून ४ जण जखमी झाले. यापैकी दोघांची प्रकृती गंभीर आहे. हा अपघात काल दुपारी २ वाजेच्या सुमारास घडला. जखमींवर यावल रुग्णालयात उपचार करून पुढील उपचारार्थ दोघांना जळगावला हलवण्यात आले आहे.
कीनगाव येथील गणेश भागवत माळी (वय ३९), मगन दौलत माळी (वय ६५, ) हे दुचाकीने (एमएच.१९-बी.पी.३८३९) हे यावलला येत होते. त्यांच्या मागून दुचाकीने (एमएच.१९- ८८३८) जाकीर मुसा पटेल (वय ३८), त्यांच्या पत्नी अफशानबी जाकीर पटेल (वय ३२, रा.महेलखेडी) हे येत होते. दरम्यान त्यांच्या समोरील ट्रकने अचानक ब्रेक दाबले. त्यामुळे मागील दोन्ही दुचाकीचे नियंत्रण सुटून अपघात झाला. त्यात दोन्ही दुचाकींवरील चौघे जखमी झाले. यावल येथील रफिक शेख, अड.रियाज पटेल, अशोक तायडे व प्रवीण बारी यांनी जखमींना यावल ग्रामीण रुग्णालयात दाखल केले. यापैकी जाकीर पटेल, अफशानबी यांना जळगावला हलवण्यात आले.
