१६ जुलै पासून सुरू होणार दहावी-बारावीच्या पुरवणी परीक्षा
पुणे, मंडे टु मंडे न्युज नेटवर्क l राज्य माध्यमिक व उच्च माध्यमिक शिक्षण मंडळातर्फे दहावी-बारावीच्या पुरवणी परीक्षा १६ जुलैपासून सुरू होणार आहेत. या परीक्षांसाठीचे प्रवेशपत्र गुरुवारी ४ जुलैपासून उपलब्ध करून देण्यात येणार आहे.
राज्य मंडळाचे प्रभारी सचिव शैलेंद्र पाटील यांनी कोणतेही शुल्क न घेता प्रवेशपत्राची मुद्रित प्रत विद्यार्थ्यांना देण्याची सूचना केली आहे. जुलै-ऑगस्टमध्ये होणाऱ्या दहावी-बारावीच्या पुरवणी परीक्षेची प्रवेशपत्रे सर्व विभागीय मंडळाच्या कार्यकक्षेतील सर्व माध्यमिक व उच्च माध्यमिक शाळा, कनिष्ठ महाविद्यालयांनी मुद्रित करून विद्यार्थ्यांना द्यायची आहेत. प्रवेशपत्राची मुद्रित प्रत देण्यासाठी कोणतेही वेगळे शुल्क न घेण्याबाबत स्पष्ट करण्यात आले आहे.
