बिबट्याच्या हल्ल्यात २ वर्षांच्या चिमुकलीचा मृत्यू, शेतकऱ्यांमध्ये भीतीच वातावरण
यावल, मंडे टु मंडे न्युज नेटवर्क |यावल तालुक्यातील डांभुर्णी शिवारात दोन वर्षांच्या मेंढपाळ कुटुंबातील चिमुकलीला ती तिच्या आई जवळ झोपली असताना बालिकेला बिबट्याने झडप घालून उचलून नेवून ठार केल्याची घटना घडल्याने परिसरात एकच खळबळ उडाली.
या संदर्भातील माहिती अशी की, मेंढपाळांचे कुटुंब यावल तालुक्यातील डांभुर्णी येथील शेत शिवारात गट क्र. ७४१ मध्ये गेल्या चार ते पाच दिवसापासून वास्तव्याला असून काल मध्यरात्रीच्या सुमारास रत्नाबाई ही दोन वर्षांची चिमुकली तिची आई जिजाबाई रूपनर सोबत झोपली असताना बिबट्याने झडप घालून उचलून शेजारील बागेत पळून गेला. तिची आई जिजाबाईच्या लक्षात येताच तिने आरडाओरडा केला मात्र तो पर्यंत बिबट्या रात्रीची वेळ असल्याने अंधाराचा फायदा घेत चिमुकलीला घेऊन पसार झाला होता. लागलीच बालिकेचा शोध घेतला असता थोड्या अंतरावर तिच्या शरीराचे लचके तोडलेल्या अवस्थेत तिचा मृतदेह आढळून आला.
दरम्यान, या दुर्घटनेची माहिती रात्री एक वाजेच्या सुमारास वन अधिकाऱ्यांना कळविण्यात आली. रात्री लागलीच वन अधिकारी विपुल पाटील, पश्चीम विभागाचे वनपरिक्षेत्र अधिकारी सुनील भिलावे व अन्य सहकाऱ्यांचे पथक हे घटनास्थळी दाखल झाले. डांभुर्णी येथील पोलीस पाटलांनी दिलेल्या माहितीनंतर यावल पोलीस निरिक्षक प्रदीप ठाकूर व त्यांचे सहकारी देखील रात्रीच येथे दाखल झाले.
या दुर्घटनेने परिसरात खळबळ उडाली असून रात्री-अपरात्री शेतकऱ्यांना शेत शिवारात जावे लागते. यातच बिबट्याची परिसरात दहशत पसरल्याने शेतकरी व शेतमजुरांमध्ये भीतीचे वातावरण पसरले आहे. वन विभागाने या नरभक्षक बिबट्याला पकडण्याची मागणी आता होऊ लागली आहे.
