जामनेरात तरुणावर टोळक्याकडून प्राणघातक हल्ला !
मंडे टू मंडे वृत्तसंकलन।
जामनेर, मंडे टू मंडे वृत्तसेवा। येथील भुसावळ रोडवरवर असलेल्या शेतात काल रात्री पिकांना पाणी देण्यासाठी गेलेल्या तरुणावर एका टोळक्याने प्राणघातक हल्ला केल्याची खळबळजनक घटना घडली आहे.
अधिक माहिती अशी, शहरातील जामनेरपुरा भागातील रहिवासी असणारा सचिन संतोष बोरसे हा तरूण भुसावळ रोडवर असणार्‍या आपल्या शेतातील पिकांना पाणी देण्यासाठी काल रात्री गेला होता. शेतात जाताच पाठीमागून कुणीतरी त्याच्या डोक्यावर जोरदार हल्ला केला. यानंतर पाच-सहा जणांनी त्याला विहिरीत ढकलण्याचा प्रयत्न केला. मात्र त्याने आरडा-ओरडा केल्याने हल्लेखोर पळून गेले. दरम्यान, सचिन बोरसे याने घायळ असतांनाही आपल्या मित्रांना या प्रकाराची माहिती दिली. यामुळे त्याच्या मित्रांनी तात्काळ घटनास्थळी धाव घेतली. त्याच्यावर जामनेरात प्राथमिक उपचार करून त्याला पुढील उपचारासाठी पाचोरा येथील खासगी रूग्णालयात हलविण्यात आले आहे. घटनेची माहिती मिळताच पोलीस निरिक्षक किरण शिंदे आणि त्यांच्या सहकाऱ्यांनी सचिन याची विचारपूस केली असून, याप्रकरणी जामनेर पोलीस ठाण्यात गुन्हा दाखल करण्यात आला आहे. पुढील तपास सुरू आहे.
