दीड लाखांची लाच स्वीकारतांना मंडळ अधिकाऱ्यासह तलाठी एसीबीच्या जाळ्यात
अमळनेर,जि. जळगाव, मंडे टू मंडे न्युज वृत्तसेवा। डंपरवर कारवाई न करता सोडण्याच्या मोबदल्यात दीड लाखांची लाच स्वीकारतांना गणेश राजाराम महाजन, वय-४६ वर्ष, व्यवसाय-नोकरी, तलाठी, अमळनेर शहर,रा.नवीन बसस्टँड समोर,पाळधी,ता.धरणगाव,आणि दिनेश शामराव सोनवणे, वय-४८ वर्षे, व्यवसाय-नोकरी, मंडळ अधिकारी, अमळनेर, रा.फरशी रोड,अमळनेर.या तलाठी आणि मंडळ अधिकाऱ्याला रंगेहात अटक करण्यात आली. या कारवाईने मोठी खळबळ उडाली.
तक्रारदार यांचा अमळनेर शहरात व अमळनेर तालुक्यात बिल्डींग मटेरीयल सप्लायर्सचा व्यवसाय आहे. सदर व्यवसायासाठी त्यांच्याकडे स्वतःच्या मालकीचे ३ डंपर आहेत व करारनामा तत्वावर विकत घेतलेले ३ डंपर आहेत. त्यापैकी करारनामा तत्वावर विकत घेतलेले डंपर क्रं.एमएच १८ AA ११५३ हे अमळनेर शहरात माती वाहतूक करतांना सुमारे २ महिन्यापुर्वी तहसिल कार्यालय अमळनेर येथे जमा करण्यात आलेले होते.
या डंपरवर कारवाई न करता सोडण्याच्या मोबदल्यात तक्रारदार यांचेकडे गणेश राजाराम महाजन आणि दिनेश शामराव सोनवणे यांनी दोन लाखांच्या लाचेची मागणी केली. तडजोडीनंतर ही रक्कम दीड लाख इतकी ठरली. दरम्यान, तक्रारदाराने याबाबत एसीबीच्या कार्यालयात तक्रार केली होती.
