भुसावळ दुहेरी हत्याकांड : सहाव्या फरार आरोपीला अटक
भुसावळ, मंडे टु मंडे न्युज नेटवर्क l भुसावळ शहरातील सामाजिक कार्यकर्ते व माजी नगरसेवक संतोष बारसे व सामाजिक कार्यकर्ते सुनील राखुंडे यांच्या दुहेरी हत्याकांड प्रकरणी फरार संशयित आरोपीं पैकी एका आरोपीला भुसावळ बाजारपेठ पोलीसानी भुसावळ तालुक्यातील वरणगाव येथे शिताफिने अटक केली.आता अटकेतील संशयित आरोपींची संख्या ६ झाली आहे. अजून पाच ते सहा संशयित आरोपी फरार आहेत.
गेल्या महिन्यात भुसावळ येथे माजी नगरसेवक संतोष बारसे व सुनील राखुंडे यांचे कारमधून जात असताना गोळ्या घालून हत्या करण्यात आली होती. याप्रकरणीच्या तपासामध्ये आतापर्यंत पाच संशयित आरोपींना अटक करण्यात आलेली आहे. एका आरोपीकडून गावठी पिस्तूल व काडतुसे जप्त करण्यात आली आहेत.
दि. २२ जून शनिवार रोजी दुपारी बाजारपेठ पोलीस स्टेशनचे निरीक्षक गजानन पडघन यांनी वरणगाव शहरांमध्ये साक्री फाटा येथे संशयित आरोपी नितीन पथरोड याला सापळा रचून अटक केली. त्याला भुसावळ बाजारपेठ पोलीस स्टेशन येथे आणण्यात आले. त्यानंतर पुढील कायदेशीर कारवाई करण्यात आली आहे.या हत्याकांडातील प्रमुख संशयित आरोपी अद्यापही फरार असून त्यांचा शोध घेण्याचे काम सुरू आहे. सदरची कारवाई ही निरीक्षक गजानन पडघन यांच्या मार्गदर्शनाखाली पोहेकॉ विजय नेरकर, यासीन पिंजारी, महेश चौधरी, जावेद शाह, सचिन चौधरी आदीनी केली आहे.
