गुटखा तस्करावर मोठी कारवाई, मुद्देमालासह साडे आठ लाखांचा अवैध गुटखा जप्त
जामनेर, मंडे टु मंडे न्युज नेटवर्क l स्विफ्ट डिझायर कार मधून बोदवड मार्गे जाणारा सुमारे ४ लाख २९ हजार ९५० रुपयांचा प्रतिबंधित असलेला गुटखा व ४ लाखांची स्विफ्ट डिझायर कार असा मुद्देमालासह एकूण ८ लाख २९ हजार ९५० रूपयांचा गुटखा जामनेर पोलिसांनी जळगाव रोडवरील मराठा मंगल कार्यालयाजवळ आज दुपारी ३ वाजेच्या सुमारास तस्करी करीत असताना जप्त करण्यात आला असून यात एकाला अटक करण्यात आली आहे.
या बाबत मिळालेल्या माहितीनुसार, जामनेर पोलिसांना जामनेर येथून एका स्विफ्ट कारने अवैधरित्या गुटख्याची तस्करी होत असल्याची माहिती मिळाली असता जामनेर पोलीस स्टेशनचे पोलीस निरीक्षक किरण शिंदे आणि सहकाऱ्यांनी जळगाव रोडवर असणाऱ्या मराठा मंगल कार्यालयाजवळ सापळा रचला असता कार थांबवून चालक पावन मोहीत गोसावी, वय ३० वर्ष. रा. मुक्ताईनगर. याची चौकशी केली असता कारमध्ये विमल गुटखा ,तंबाकू ४ लाख २९ हजार ९५० रुपये आणि कार ४ लाख रुपये असा एकूण ८ लाख २९ हजार ९५० रुपयांचा मुद्देमाल हातगत करून पावन गोसावीला अटक केली. सदर कारवाई पोलीस निरीक्षक पावन शिंदे यांच्या मार्गदर्शना खाली अतुल पायावर, निलेश घुगे, अमोल पाटील आदिनीं केली असून चालक पावन गोसावी यांच्यावर जामनेर पोलीस स्टेशनला गुन्हा दाखल करण्यात आला असून पुढील तपास जामनेर पोलीस करीत आहे.
