मोठी बातमी : शिवसेना शिंदे गटाच्या आमदारावर विनयभंग केल्याचा आरोप
मंडे टु मंडे न्युज नेटवर्क l नुकत्याच विधानसभेच्या निवडणुका आटोपल्या, येत्या काही दिवसात नव्या मंत्रिमंडळाचा शपथविधी होणार आहे मात्र त्यापूर्वी एक मोठी बातमी समोर येत आहे. शिवसेना शिंदे गटाच्या नवनियुक्त आमदारावर मारहाण करून महिलेचा विनयभंग केल्याचा आरोप करण्यात आला आहे.
समोर आलेल्या माहिती नुसार, अक्कलकुवा येथील सोरापाडा येथे दोन गटात वाद झाला. त्यात शिवसेना शिंदे गटाचे नवनियुक्त आमदार आमशा पाडवी यांच्यावर महिलेला मारहाण आणि तिचा विनयभंग केल्याचा आरोप करण्यात आला आला. विशेष म्हणजे आरोप करणारी महिला आणि तिचा भाऊ हे भाजपचे कार्यकर्ते असून तिचा भाऊ भाजपचा पंचायत समिती सदस्य आहे. त्यामुळे आता आमशा पाडवी यांच्या अडचणीत वाढ होण्याची शक्यता आहे.
दरम्यान या प्रकरणात आमदार पाडवी यांचा मुलगा जिल्हा परिषद सभापती शंकर पाडवी, मुलगी सोरापाडा सरपंच अंजू पाडवी, यांच्यासह त्यांच्या कार्यकर्त्यांवर अक्कलकुवा पोलीस स्टेशनमध्ये गुन्हा दाखल करण्यात आला आहे. ग्रामपंचायत निवडणूक आणि विधानसभा निवडणुकीत पाडवी यांच्या विरोधात काम केल्याच्या रागातून परिवारातील सदस्य आणि महिलेला मारहाण झाल्याचा आरोप करण्यात आला आहे. या प्रकरणामुळे महायुतीमधील दोन प्रमुख घटक पक्ष असलेल्या शिवसेना शिंदे गट आणि भाजपमधील संघर्ष समोर आला आहे.
तर दुसरीकडे आमदार पाडवी यांच्या मुलीनेही भाजपा पदाधिकाऱ्यांवर गुन्हा दाखल केला आहे. शिंदे गटाचे जिल्हाप्रमुख किरसिंग वसावे, भाजप नेते नागेश पाडवी, भाजपा तालुका अध्यक्ष नितेश वळवी यांच्यासह आरोप करणारी महिला आणि त्यांच्या भावाच्या विरोधात अक्कलकुवा पोलीस स्टेशनमध्ये गुन्हा दाखल करण्यात आला आहे.
