मशिदींवरील भोंग्यावर कारवाई न करणे हा न्यायालयाचा अवमान, न्यायालयाने पोलिसांना फटकारलं
मुंबई, मंडे टू मंडे न्युज वृत्तसेवा : मशिदीवरच्या लाऊडस्पीकरवरून हायकोर्टाने मुंबई पोलिसांना फटकारलं आहे. मशिदीवर लावलेल्या लाऊडस्पीकरमुळे होणाऱ्या ध्वनी प्रदुषणाविरोधात कारवाई न करणे हा न्यायालयाचा अवमान आहे, असं निरिक्षण हायकोर्टाने नोंदवलं आहे. याबाबत कोर्टाने झोन 12 चे पोलीस उपायुक्त यांना उत्तर सादर करण्याचे आदेश दिले आहेत.
कांदिवलीच्या लक्ष्मीनगर भागातील गौसिया मशिदीच्या लाऊडस्पीकरमुळे होणाऱ्या प्रदुषणासंदर्भात दाखल याचिकेवर मुंबई हायकोर्टामध्ये सुनावणी झाली. स्थानिक रहिवासी रिना रिचर्ड यांनी ही याचिका दाखल केली आहे. मशिदीवर लावलेल्या लाऊडस्पीकरमुळे होणाऱ्या ध्वनी प्रदुषणाविरोधात कारवाई न करणे हा न्यायालयाचा अवमान आहे, असं निरिक्षण हायकोर्टाने नोंदवलं आहे.
ध्वनी प्रदुषणाबाबत सुप्रीम कोर्टाने दिलेल्या निर्देशांचं पालन करण्याचे कडक निर्देश हायकोर्टाने पोलिसांना दिले आहेत. तक्रार करून देखील पोलीस दखल घेत नसल्याचा आरोप याचिकाकर्त्यांनी केला आहे. प्रकरणाची सुनावणी 29 मे पर्यंत तहकूब करण्यात आली आहे.
अनेक ठिकाणी नागरिकांच्या तक्रारी असताना देखिल पोलीस प्रशासनाकडून कारवाई होत नसल्याची ओरड सामान्य नागरिकांकडून करण्यात येत आहे. मागच्या वर्षी मशिदींवरच्या भोंग्यावरून मनसे अध्यक्ष राज ठाकरे चांगलेच आक्रमक झाले होते. सुप्रीम कोर्टाच्या निर्देशानुसार मशिदींवरचे भोंगे काढले नाहीत तर हनुमान चालिसा लावू, असा इशारा राज ठाकरे यांनी दिला होता, त्यानंतर महाराष्ट्राचं राजकारण चांगलंच तापलं होतं.
