ब्रेकिंग : जिल्ह्यात हत्याकांडाची शृंखला सुरूच, जळगावात गळा चिरून तरुणाची निर्घृण हत्या
जळगाव, मंडे टु मंडे न्युज नेटवर्क l जळगाव शहरातील नाथवाडा परिसरात सिंधी कॉलनी रस्त्यावर एका तरुणाचा गळा चिरून खून करण्यात आल्याची धक्कादायक घटना आज सोमवार दि. ३ जुन रोजी पहाटेच्या सुमारास उघडकीस आल्याने मोठी खळबळ उडाली आहे.
जळगाव शहरातील नाथवाडा परिसरातील ललित प्रल्हाद वाणी, वय-४५, रा. नाथवाडा परिसर जळगाव. हा तरुण सुप्रीम कंपनी, गाडेगाव येथे कामाला आहे. रात्री १२ वाजेच्या सुमारास कामावरून तो दुसरी शिफ्ट आटोपून घरी येत असताना सिंधी कॉलनी ते नाथवाडा रस्त्यावर अज्ञात व्यक्तीने त्यांच्या गळ्यावर कुठल्यातरी कारणाने धारदार शस्त्राने वार करून त्यांची निर्घूण हत्या केली.
आज दि.३ जून रोजी सोमवारी पहाटेच्या सुमारास मुख्य चौकात बांधकाम सुरू असलेल्या इमारतीच्या बाहेर वाळूवर त्यांचा मृतदेह मिळून आला. घटनेची माहिती मिळताच एमआयडीसी पोलीस ठाण्याचे निरीक्षक बबन आव्हाड यांच्यासह पथकाने धाव घेतली. अज्ञात इसमानी त्यांच्या गळ्यावर वार केल्याने त्यांचा मृत्यू झाला आहे. मयताची बॅग रस्त्याच्या कडेला मिळून आली असून उपविभागीय पोलीस अधिकारी संदीप गावीत हे घटनास्थळी पोहचले असून फॉरेन्सिक टीम नमुने घेत आहे.
एमआयडीसी पोलीस स्टेशनला गुन्हा दाखल करण्याची प्रक्रिया सुरू आहे. दरम्यान कंजरवाडा येथून एका संशयित इसमाला पोलिसांनी ताब्यात घेतल्याची माहिती मिळत आहे. मयत ललित वाणी यांच्या पश्चात आई, वडील, पत्नी, २ मुले असा परिवार आहे.
