मध्यप्रदेशात बसचा भीषण अपघात; १४ जण ठार !
रिवा, वृत्तसेवा : येथील रिवामध्ये भीषण अपघात झाला आहे. या अपघातात 14 जणांचा मृत्यू झाला आहे. तर 40 जण जखमी झाले आहेत. या अपघाताची माहिती मिळताच घटनास्थळी पोलीस, स्थानिक नागरिक मदतीसाठी दाखल झाले.
मध्यप्रदेश आणि उत्तरप्रदेशला जोडणाऱ्या नॅशनल हायवे 30 वर हा भीषण अपघात झाला आहे. अपघात झालेली बस हैदराबादच्या दिशेने गोरखपूरला जात होती. रात्री 11.30 च्या सुमारास रिवाजवळ हा अपघात झाला आहे. बसमधील सर्व प्रवासी कामगार होते. दिवाळी साजरी करण्यासाठी आपल्या घरी जात असतांना त्यांच्यावर काळाने घात केला.
अपघाताची माहिती मिळताच घटनास्थळी स्थानिक नागरिकांच्या मदतीने बचावकार्य मोठ्या वेगाने सुरू केले. पोलीसांच्या पथकाकडून रेस्क्यू ऑपरेशन सुरू आहे. हा अपघात नेमका कसा झाला याबाबत अद्याप कोणतीही माहिती समोर येऊ शकलेली नाही. तसेच गाडीमध्ये 54 प्रवासी असल्याचे बोलले जात आहे.
