अक्षय्य तृतीयेच्या मुहूर्तावर खा. रक्षाताई खडसे आ.चंद्रकांत पाटील यांच्या निवासस्थानी, एकदिलाने काम करण्याचे संकेत
मुक्ताईनगर, मंडे टु मंडे न्युज प्रतिनिधी l आ. चंद्रकांत पाटील यांनी रक्षाताई खडसे यांच्या प्रचारात मुक्ताईनगर मतदार संघाचे आमदार चंद्रकांत पाटील यांनी सक्रीय होण्याची घोषणा केल्यानंतर आज साडे तीन मुहूर्तापैकी एक असलेल्या अक्षय्य तृतीयेच्या मुहूर्तावर स्वत: रक्षाताई या चंद्रकांत भाऊं पाटील याच्या निवासस्थानी पोहचल्या. याप्रसंगी दोन्ही मान्यवरांनी मनोमीलन करत आगामी निवडणुकीत एकदिलाने काम करण्याचे संकेत दिलेत.
लोकसभा निवडणुकीच्या प्रचारात मुक्ताईनगरचे आमदार चंद्रकांत पाटील यांनी आधी तटस्थ राहण्याची भूमिका घेतली होती. काही दिवसांपूर्वी भुसावळ येथे झालेल्या देवेंद्र फडणवीस यांच्या सभेत आमदार चंद्रकांत पाटील यांनी हजेरी लावल्याने त्यांची नाराजी दुर झाल्याचे स्पष्ट झाले होते. तसेच कालच, पालकमंत्री ना. गुलाबराव पाटील यांनी आमदार पाटील यांच्या निवासस्थानी भेट दिली. याप्रसंगी चंदूभाऊंनी प्रचारात सक्रीय होणार असल्याचे संकेत दिले होते. तसेच रक्षाताई खडसे आमदार चंद्रकांत पाटील यांच्या घरी भेट देणार असल्याचे देखील याप्रसंगी पालकमंत्र्यांनी सांगितले होते.
आज अक्षयतृतीयेच्या मुहुर्तावर रक्षाताई खडसे यांनी आमदार चंद्रकांत पाटील यांच्या घरी सदिच्छा भेट दिली. पाटील कुटुंबाच्या वतीने त्यांचे स्वागत करण्यात आले. यानंतर दोन्ही मान्यवरांनी शिवसेनेच्या पदाधिकार्यांसह चर्चा केली. याप्रसंगी भाजपचे लोकसभा प्रमुख नंदू महाजन, शिवसेनेचे पदाधिकारी छोटू भोई, अफसर खान आदींसह अन्य मान्यवरांची उपस्थिती होती. या भेटीनंतर आमदार चंद्रकांत पाटील हे आता रक्षाताई खडसे यांच्यासाठी प्रचाराच्या शेवटच्या टप्प्यात सक्रीय होतील असे स्पष्ट झाले आहे.
