भाऊ भावाचा वैरी, मोठ्या भावाने केली लहान भावाची झोपेतच हत्या
जळगाव, मंडे टू मंडे न्युज नेटवर्क l मोठया भावाने झोपेत असलेल्या लहान भावाच्या डोक्यात कुऱ्हाडने सपासप वार करून त्यांची हत्या केल्याची एक धक्कादायक घटना समोर आली आहे. ही घटना भडगाव तालुक्यातील पिचर्डे गावात घडली.
मिळालेल्या माहितीनुसार, भडगाव तालुक्यातील पिचर्डे येथे विठ्ठल आनंदा पाटील हे रात्री खळयातील मोकळया जागेत झोपलेले असताना त्यांचा मोठा भाऊ अभिमन आनंदा पाटील यांनी आपल्या लहान भावाचा खून करून आपल्या घरी निघून गेले. सकाळी दुसरा लहान भाऊ खळयात गेले तेव्हा त्यांना विठ्ठल आनंदा पाटील मृतव्यवस्थेत आढळल्याने त्याला धक्काच बसला.त्याने लागलीच पोलिस पाटलांना ही माहिती दिली. पोलिस पाटील यांनी भडगाव पोलिस स्टेशनला कळवले.घटना स्थळी भडगाव पोलिस पथक दाखल होत त्यांनी लागलीच तपास सुरू केल्यानंतर त्यांना मोठया भावावर संशय आल्याने त्यांनी मोठ्या भावाला ताब्यात घेतले. पोलिसांनी त्याला पोलीसी खाक्या दाखवताच मोठया भावाने गुन्हा कबूल केला.
खून प्रकरणात वापरलेले हत्यार पोलिसांनी ताब्यात घेतले असून, मृतदेहास भडगाव ग्रामीण रुग्णालय येथे आणण्यात आला, यावेळी पोलिस उपअधीक्षक अभयसिंग देशमुख यांनी भेट दिली. पोलिस निरीक्षक पवार उपस्थित होते. या घटनेचा पुढील तपास पीएसआय डोमाळे यांच्या नेतृत्वात भडगाव पोलीस करीत आहेत.
