सातबारा उताऱ्यावर बोजा लावण्यासाठी मागितली लाच, तलाठ्या सह दोघांना अटक
जळगाव, मंडे टू मंडे न्युज नेटवर्क l शेत जमिनीच्या सातबारा उताऱ्यावर विकासोतून कर्ज घेण्यासाठी बोजा बसवण्याच्या मोबदल्यात १ हजारांची लाच घेणाऱ्या तलाठीसह एका खाजगी पेंटरला जळगाव लाच लुचपत विभागाच्या पथकाने पकडले. ही कारवाई पारोळा तालुक्यातील लोणी येथे करण्यात आली.या घटनेने जळगाव जिल्हा महसूल विभागात मोठी खळबळ उडाली आहे.
पारोळा तालुक्यातील लोणी गावातील ३९ वर्षीय तक्रारदार यांचे व त्यांच्या कुटुंबियांच्या नावे लोणी बु. ता.पारोळा येथे साडे सहा एकर शेत जमीन आहे. सदर शेत जमिनीवर तक्रारदार यांना लोणी बु. गावातील वि. का.सो. सहकारी सोसायटीमधुन कर्ज घेण्यासाठी सदर शेत जमिनीचे ७/१२ उताऱ्यावर बोजा चढविणे आवश्यक होते.
त्यामुळे तक्रारदार हे चोरवडी येथील तलाठी कार्यालयातील तलाठी सुभाष विठ्ठल वाघमारे वय- ३४ वर्षे, ह.मु. बोहरा स्कूल जवळ,वर्धमान नगर, पारोळा. यांची चोरवड येथील कार्यालयात जाऊन भेट घेतली. त्यावेळी त्यांनी सांगितले की, तुमच्या व कुटुंबीयांच्या नावे असलेल्या शेत जमिनीच्या सातबारा उताऱ्यावर कर्जाचा बोजा चढण्याच्या मोबदल्यात ४ उताऱ्यांचे प्रत्येकी २०० रुपये प्रमाणे ८०० रुपये आणि मागील कामाचे दोनशे रुपये असे एकूण १ हजार रुपये द्यावे लागतील.
त्यांना तक्रारदार याना पैसे द्यायचे नसल्याने तक्रारदार यांनी याबाबत जळगाव लाचलुचपत विभागाच्या पथकाकडे तक्रार दिली. दरम्यान पथकाने सोमवारी ३० सप्टेंबर रोजी दुपारी ३ वाजता सापळा रचला. तक्रारदार कडून खाजगी पंटर शरद प्रल्हाद कोळी वय-४३ रा. चोरवड ता.पारोळा यांच्या फोनपेवर टाकण्यास सांगून लाच मिळविण्याचा प्रयत्न केला. दरम्यान पथकाने दोघांना अटक केली. याप्रकरणी पारोळा पोलीस स्टेशनला गुन्हा दाखल करण्यात आला आहे.
सदर ची कारवाई पोलीस उपअधीक्षक योगेश ठाकूर यांचे मार्गदर्शनाखाली पोलीस निरीक्षक नेत्रा जाधव, निरीक्षक स्मिता नवघरे, पोहेको शैला धनगर, पोकॉ/प्रदिप पोळ,पीएसआय दिनेशसिंग पाटील, पोहेकॉ,रविंद्र घुगे, सुनिल वानखेडे, पोना बाळू मराठे, पोना किशोर महाजन, पोकॉ प्रणेश ठाकुर, पोकॉअमोल सुर्यवंशी यांनी केली आहे.
