महाराष्ट्रात पुढील ४८ तास धोक्याचे, “या” भागात पडणार अतिमुसळधार पाऊस
मंडे टु मंडे न्युज नेटवर्क l महाराष्ट्रात मान्सूनचं आगमन झालं आहे, मान्सूनच्या वाटचालीसाठी अनुकूल वातावरण असून, पुढील दोन ते तीन दिवसांत मान्सून संपूर्ण महाराष्ट्र व्यापेल असा अंदाज हवामान विभागाकडून (IMD) वर्तवण्यात आला आहे.
पुण्यामध्ये पावसानं धुमाकूळ घातला आहे, शहरात ढगफुटी सदृष्य पाऊस झाला आहे. अनेकांच्या घरात पाणी शिरल्यानं मोठं नुकसान झालं आहे. नागरिकांची चांगलीच धावपळ उडाली. आजही पावसाचा अंदाज वर्तवण्यात आला आहे. दरम्यान हवामान विभागानं वर्तवलेल्या अंदाजानुसार आज मुंबईमध्ये हलक्या ते मध्यम स्वरुपाच्या पावसाची शक्यता आहे. हा मान्सून पूर्व पाऊस असेल तर पुढील एक ते दोन दिवसांत मान्सून मुंबईत धडकणार असून त्यानंतर मान्सूनच्या सरी कोसळतील.
उत्तर महाराष्ट्र सह मान्सून ११ जून पर्यंत संपूर्ण राजू व्यापणार असून राज्यात आज पासून पावसाचा जोर वाढणार असल्याचेही हवामान विभागाने सांगितले आहे.
हवामान विभागानं दिलेल्या माहितीनुसार पुढील चार दिवस राज्यात मुसळधार पावसाची शक्यता आहे. मराठवाडा आणि विदर्भातील अनेक जिल्ह्यांमध्ये विजांच्या कडकडाटासह जोरदार पावसाचा अंदाज वर्तवण्यात आला आहे. दुसरीकडे कोकण आणि मध्य महाराष्ट्रात तर हवामान विभागाकडून मुसळधार ते अतिमुसळधार पावसाचा इशारा देण्यात आला आहे. विजांच्या कडकडाटासह जोरदार पावसाची शक्यात आहे. पावसासोबत महाराष्ट्रात वादळाचा इशारा देखील हवामान विभागाकडून देण्यात आला आहे. या काळात राज्यात वाऱ्याचा वेग ताशी ५० ते ६० किमी इतका राहणार आहे.
आज राज्यातील अनेक भागांमध्ये ढगाळ वातावरण असून, नागरिकांची उष्णतेपासून सुटका झाली आहे. राज्यातील अनेक भागांमध्ये जोरदार पावसानं हजेरी लावली आहे. पुढील ४८ तासांसाठी सतर्कतेचा इशारा देण्यात आला आहे. उत्तर कोकण, मध्य महाराष्ट्र, मराठवाडा,आणि विदर्भातील जिल्ह्यांमध्ये काही ठिकाणी विजांच्या कडकडाटासह वादळ व मध्यम पाऊस पडण्याची शक्यता आहे.काही तासांमध्ये मुंबई ,उपनगर,पालघर,अहमदनगर, सोलापूर, सांगली व नाशिक जिल्ह्यात पावसाची शक्यता वर्तविली आहे.तर छत्रपती संभाजीनगर,लातूर,बीड,जालना,धाराशिव या जिल्ह्यांचा पावसाचा इशारा देण्यात आला आहे.
