जळगाव पुन्हा मर्डरने हादरले : तरुणाची चॉपरने वार करून निर्घृण हत्या
जळगाव, मंडे टू मंडे वृत्तसेवा : शहरातील चौघुले प्लॉट परिसरात रविवारी रात्री दहा वाजेच्या सुमारास एका सलून व्यवसायिक तरुणाची चॉपरने वार करून निर्घृण हत्या करण्यात आल्याने शहरात खळबळ उडाली आहे.
मिळालेली माहिती अशी, ममुराबाद रस्त्यावर असलेल्या प्रजापत नगरात राहणाऱ्या सुनील सुरेश टेमकर वय-३६ या तरुणाचे चौघुले प्लॉट परिसरात सलून दुकान आहे. गेल्या ५ दिवसांपासून तो आजारी असल्याने त्याचे दुकान बंद होते. रविवारीच त्याने दुकान उघडले होते. रात्री १० वाजेच्या सुमारास त्याच्यावर अज्ञातांनी चॉपरने वार केल्याने त्याला गंभीर दुखापत झाली. जखमी अवस्थेत त्याला जिल्हा रुग्णालयात दाखल करण्यात आले मात्र, त्यादरम्यान त्याचा मृत्यू झाला. जिल्हा रुग्णालयात शनीपेठ पोलीस ठाण्याचे निरीक्षक बळीराम हिरे हे पथकासह पोहचले असून परिस्थिती नियंत्रणात आहे.
