अज्ञात वाहनांची दुचाकीला धडक : सावदा येथील दोघांचा मृत्यू !
मंडे टू मंडे वृत्तसंकलन।
जळगाव, मंडे टू मंडे वृत्तसेवा : राष्ट्रीय महामार्गावरील नशिराबाद जवळ गोदावरी हॉस्पिटलजवळच्या रेल्वे उड्डाण पुलाजवळ अज्ञात वाहनाने दिलेल्या धडकेत सावदा येथील दोन मोटारसायकलस्वारांचा जागीच मृत्यू झाल्याची घटना आज सकाळी ९:१५ वाजेच्या सुमारास घडली आहे.
याबाबत मिळालेली माहिती अशी, मोटारसायकलवरून जळगावकडे सावदा येथील राजेंद्र भादू डोळे (वय-४२ पाटीलपुरा सावदा, ता. रावेर) व शेख महेमूद शेख रज्जाक (वय-५३ रा. मोठा आखाडा, सावदा) हे दोघे कामानिमित्त जात असतांना राष्ट्रीय महामार्गावरील गोदावरी हॉस्पिटलजवळच्या रेल्वे उड्डाण पुलाजवळ अज्ञात वाहनाने त्यांच्या दुचाकीला जोरदार धडक दिली त्यात दोघांचा जागेवरच मृत्यू झाला.
अपघाताची माहिती मिळताच नशिराबाद पोलिसांनी घटनास्थळी धाव घेतली असून पंचनामा केला आहे. शेवटचे वृत्त हाती आले तेव्हा या संदर्भात नशिराबाद पोलीस स्थानकात गुन्हा नोंदविण्याची प्रक्रिया सुरू होती.
