त्यांनी ईडी लावली, माझे सीडी लावण्याचे काम बाकी– माजी मंत्री एकनाथ खडसे
मंडे टू मंडे वृत्तसंकलन।
जामनेर (प्रतिनिधी)। राष्ट्रवादीच्या परिवार संवाद यात्रेचे आयोजन माजी मंत्री आ. गिरीश महाजन यांचा बालेकिल्ला असणार्‍या जामनेरात काल रात्री उशीरा करण्यात आले होते यात त्यांनी ईडी लावल्याने माझें सीडी लावण्याचे काम बाकी आहे, असा इशारा एकनाथराव खडसे यांनी दिला आहे.
जामनेरात काल रात्री उशीरा राष्ट्रवादीच्या परिवार संवाद यात्रेचे आयोजन करण्यात आले. खडसे म्हणाले की, राष्ट्रवादीमध्ये पक्षप्रवेश घेताना जयंतराव मला म्हणाले होते, तुमच्या मागे ईडी लागली तर, तेव्हा मी म्हणालो होतो मग मी सीडी लावेल. असं मी गंमतीने म्हणालो होतो. पण खरंच माझ्या मागे ईडी लागल्याने आपलं सीडी लावण्याच काम अजून बाकी आहे. त्यांनी ईडी लावली. आता सीडी लावण्याचं काम बाकी आहे, असा इशारा या कार्यक्रमात बोलतांना माजी मंत्री एकनाथराव खडसे यांनी दिला आहे. खडसे यांच्या या इशाऱ्यामुळे जिल्ह्यासह राज्यात पुन्हा खळबळ निर्माण होण्याची शक्यता आहे. राजकीय वर्तुळात एकच चर्चा सुरू झाली आहे हे मात्र नक्की…!
