हमालाची कमाल : युट्युबवर व्हिडिओ पाहून छापल्या बनावट नोटा
जळगाव,मंडे टू मंडे न्युज वृत्तसेवा। या प्लॅटफॉर्मवरून अनेकजण खूप चांगलं शिकतात. यूट्यूबवर ज्ञानाच भांडार आहे. पण काही लोक यूट्यूवरून चुकीच्या गोष्टीही शिकतात. यावर तुम्हाला पैसा कमावण्याच्या अनेक पद्धतीही सापडतात. यातच युट्युबवर व्हिडिओ पाहून हमाल बनावट नोटा छापणे शिकला. पण पोलिसांनी सापळा रचून त्याला अटक केलीय. हमालाची ही कमाल पाहून पोलिसही चक्रावले आहे.
जळगाव शहराला लागून असलेल्या कुसूंबा येथील देविदास पुंडलिक आढाव याला नोटा चालविण्यासाठी ५० हजारात दीड लाखाच्या नोटा देणाऱ्यास उपविभागीय पोलिस अधिकारी संदीप गावित यांच्या पथकाने सापळा रचून अटक केली. पथकाने त्याच्याकडून १ लाख ६८ हजार ९०० रुपयांच्या नोटा जप्त केल्या आहेत.
जळगाव जिल्ह्यात मोठ्याप्रमाणात नकली नोटा चलनात आल्या असून पोलिसांकडून काही दिवसांपूर्वी बनावट नोटा पकडल्या होत्या. दरम्यान बुधवारी चोपडा उपविभागीय कार्यालयातील पोलिस नाईक राहुल बैसाने यांना एक व्यक्ती बनावट नोटा छपाई करून विक्री करीत असल्याबाबत माहिती मिळाली होती. बैसाने यांनी जळगाव उपविभागीय पोलिस अधिकारी संदीप गावित यांना कळविले. उपविभागीय पोलिस अधिकारी संदीप गावित यांच्या मार्गदर्शनाखाली पथक तयार केले.
