जामनेर रस्त्यावर ट्रकने रिक्षाला उडवले : २ जागीच ठार, ४ गंभीर जखमी !
जामनेर : – जामनेर रस्त्यावर गारखेडा गावाच्या जिनींग जवळ लाकडाने भरलेल्या ट्रकने प्रवासी वाहून नेणार्‍या पॅजो रिक्षाला दिलेल्या धडकेत २ जणांचा जागीच मृत्यू झाला तर घटनेत ४ जण गंभीर जखमी झाल्याची माहिती मिळाली आहे. घटनास्थळी जामनेर तालुक्याचे आ. गिरीश महाजन आणि त्यांच्या कार्यकर्त्यांनी तातडीने मदतकार्य सुरू करून जखमींना रुग्णालयांमध्ये दाखल करण्यासाठी मदत केली.
जामनेर ते गारखेडा दरम्यान हा अपघात झाला आहे. लाकडाने भरलेला एम.एच.- २१.६०४५ आयेशर व प्रवासी घेऊन जात असलेली पॅजो – रिक्षा एम. एच.- १९ ए.ई. ९१५८ यांच्यामध्ये ही धडक झाली आहे. या धडकेत पॅजो रिक्षातील ३ जणांचा जागीच मृत्यू झाला आहे तर चौघा जणांची प्रकृती गंभीर असल्याने त्यांना जी.एम. फाउंडेशनच्या कार्यकर्त्यांनी जवळच्या रुग्णालयात तसेच जळगावच्या जिल्हा रुग्णालयामध्ये दाखल करण्यासाठी नेल्याची माहिती मिळाली आहे. या अपघातप्रकरणी पोलीस माहिती घेण्याचे काम करीत असून घटनास्थळी नागरिकांनी एकच गर्दी केली होती. दरम्यान यातील जखमी कु-हे पानाचे ता. भुसावळ येथील असल्याची प्राथमिक माहिती मिळत आहेत.
