खिर्डी खु येथील अंगणवाडी परिसराची साफसफाई करण्याची मागणी
मंडे टू मंडे वृत्तसंकलन।
खिर्डी ता.रावेर,भिमराव कोचुरे। निंभोरा स्टे रस्त्यावरील जिल्हा परिषद अंतर्गत असलेल्या मराठी शाळेच्या आवारात जीर्ण व पडक्या अवस्थेत असलेल्या दोन अंगणवाडीच्या खोल्या बंद करण्यात आल्या असून मागील गेल्या काही वर्षांपूर्वी पश्चिमेकडील बाजूस नवीन अंगणवाडीच्या दोन खोल्या बांधण्यात आल्या असून सद्यस्थितीत त्या ठिकाणी गावातील लहान मुले बेसिक शिक्षण घेण्याकरिता येत असतात.
अंगणवाडीच्या भिंतीजवळ मोठ्या प्रमाणात गवत वाढले असून या ठिकाणी विंचू,साप यांचे वास्तव्य असण्याची शक्यता नाकारता येवू शकत नाही. तसेच अंगणवाडीच्या मागील बाजूस असलेली गटार नियमित वेळेवर साफ केली जात नसल्यामुळे या ठिकाणी डासांचा प्रादुर्भाव मोठ्याप्रमाणात वाढला असून डासांमुळे लहान मूल रोगराईला बळी पडत आहे.सदर ठिकाणी मोठ्या प्रमाणात घाणीचा विळखा पडला असून काही अप्रिय घटना घडल्यास जबाबदार कोण? अशा संतप्त प्रतिक्रिया पालक वर्ग व्यक्त करीत आहे.
तसेच या बाबत अनेक वेळा ग्रामपंचायत प्रमुखांना पालकांनी अंगणवाडी परिसराची साफसफाई करण्यात यावी असे सांगूनही आज पर्यंत हवेत विरघळणारे आश्वासन देण्यात आले मात्र अद्यापही स्वच्छता करण्यात आली नाही.सदरील परिसराची त्वरित साफसफाई करण्याची मागणी पालक वर्गासह सुज्ञ नागरिकांनी केली आहे.
