रावेर तालुक्यात शेत शिवारात पिल्लांसह बिबट्याचे दर्शन
रावेर, मंडे टु मंडे न्युज नेटवर्क | रावेर तालुक्यातील कुसुंबा बुद्रुक गावाजवळील शेती शिवारात बिबट्यासह पिल्ले नजरेस पडल्याने गावकरी व शेतकऱ्यांमधे भीतीचे वातावरण
पसरले असून याचा तात्काळ बंदोबस्त करावा अशी मागणी परिसरातील ग्रामस्थ व शेतकऱ्यांनी केली आहे.
रावेर तालुक्यातील पहाड काठी असलेल्या कुसुंबा बुद्रुक गावाजवळील शेती शिवारात केळीच्या बागेत बिबट्या काही दिवसांपासून पिल्लांसह गावाजवळील स्मशानभूमी च्या परिसरातील केळीच्या बागेत असल्याची गावकऱ्यांमधे जोरदार चर्चा सुरू आहे .कुसुंबा शेती शिवार हा केळी उत्पादन काढणारा प्रसिद्ध केळी परिसर म्हणून ओळखला जातो.
शेती कामानिमित्त शेतकरी. मजूरांसह शेतांमध्ये शेती शिवारात मोठी वर्दळ असते त्यातच सध्या स्थितीत बिबट्या त्याच्या पिल्लांसह गावकऱ्यांच्या आणि शेतकऱ्यांच्या नजरेस पडल्याने गावकरी आणि शेतकऱ्यांमधे भीतीचे वातावरण पसरले आहे . जंगलात प्राण्यांना भक्ष्य, पाणी यांचा अभाव असल्याने गावांकडे येण्याचा प्राण्यांचा कल वाढलेला दिसून येत आहे.
गेल्या काही दिवसांपूर्वी यावल तालुक्यात बिबट्याने लहान मुलांसह अनेकांवर हल्ला केल्याच्या घटना घडल्या आहेत. या घटनांनी कुसुंबा शेत शिवारात बिबट्या व पिल्ले दिसल्याने
रावेर तालुक्यातील कुसुंबा बुद्रुक परिसरातील शेतकरी, शेत मजुर, गावकरी, गावकऱ्यांमध्ये भीतीचे वातावरण पसरले आहे. या घटनेकडे वनविभागाच्या अधिकाऱ्यांनी गांभीर्याने लक्ष देऊन बिबट्याचा पिल्लांसह बिबट्याचा शोध घेऊन बंदोबस्त करावा अशी मागणी करण्यात येत आहे.
