मुक्ताईनगरात नाशिक अन्न औषध प्रशासनाची मोठी कारवाई, लाखो रुपयांचा गुटखा जप्त
मुक्ताईनगर,मंडे टू मंडे न्युज, अक्षय कठोके। नाशिक येथील अन्न औषध प्रशासनाने मध्यप्रदेशातून महाराष्ट्रात येणार्‍या वाहनातून तब्बल १८ लाख रूपयांचा गुटखा जप्त करण्यात आल्याची कारवाई आज करण्यात आली आहे.
मध्यप्रदेशच्या सीमेला लागून असल्यामुळे मुक्ताईनगर येथून मोठ्या प्रमाणात अवैध गुटख्याची तस्करी होत असते. बर्‍याचदा या प्रकारे गुटख्यांची वाहतूक करणार्‍या वाहनांना जप्त करण्यात आले आहे. आज सकाळी अशाच प्रकारची कारवाई मध्यप्रदेश आणि महाराष्ट्राच्या सीमेवरील चेक पोस्टजवळ करण्यात आली आहे.
मध्यप्रदेशातून एमएच १९ बीएम २३८४ या क्रमांकाच्या महेंद्रा बोलेरो पीकअप वाहनातून अवैध गुटखा विक्रीसाठी आणला जात असल्याची तक्रार नाशिक येथील
अन्न औषध प्रशासनाकडे करण्यात आली होती. या अनुषंगाने चेक पोस्टवर सापळा रचून सदर वाहन थांबविण्यात आले. यात तपासणी केली असता १८ लाख रूपयांचा विमल या ब्रँडचा गुटखा आढळून आला. या प्रकरणी गुटखा आणि वाहन मिळून एकूण २२ लाख रूपयांचा ऐवज जप्त करण्यात आला आहे. या प्रकरणी गुन्हा नोंदविण्यात आला आहे. नाशिकचे अन्न औषध प्रशासन गुप्तवार्ता टीम
मुक्ताईनगरात येऊन मोठी कारवाई करते तर स्थानिक प्रशासन काय करते? स्थानिक प्रशासनाच्या कार्यक्षमतेवर प्रश्न चिन्ह उपस्थित केले जात आहे.
