चोरट्यांचा गरोदर महिलासह मुलांच्या आहारावर डल्ला !
मुक्ताईनगर, मंडे टू मंडे न्युज प्रतिनिधी : शहरातील एका अंगणवाडीतून चोरट्यांनी मुलांना आणि गरोदर महिलांना देण्यात येणारा कच्चा आहारावर डल्ला मारल्याची घटना घडली आहे. याप्रकरणी मुक्ताईनगर पोलिसात गुन्हा दाखल करण्यात आला आहे.
पोलिसांनी दिलेल्या माहितीनुसार, शहरातील जुने गावातील अंगणवाडी क्रमाक १८ मधील दि ८ रोजी दुपारी १ ते ९ रोजीच्या सकाळी ९ वाजेच्या सुमारास अंगणवाडीच्या खोलीचा दरवाजाच्या कडीकोयडा तोडून लहान मुलं व गरोदर महिलांना वाटप करण्यात येणारा कच्चा आहार भुरट्या चोरट्यांनी चोरला आहे. त्यामध्ये गहूचे १० पाकीट १ हजार रुपयाचा, हरभऱ्यांचे १० पाकीट ५०० रुपयांचा, साखरेचे ५ पाकीट २०० रुपयाचे, मिठाचे ५ पाकीट १०० रुपयाचे मिरची पावडर ५ पाकीट १०० रुपयाचे याच्यासह स्टीलची भांडी, असा माल लांबविला आहे.
याप्रकरणी अंगणवाडी सेविका सुनिता विठ्ठल माळी (वय ५२) (रा.इदगाह नगर, मुक्ताईनगर) यांनी दिलेल्या फिर्यादी वरून मुक्ताईनगर पोलिस स्थानकात अज्ञात व्यक्तीवर चोरीचा गुन्हा दाखल करण्यात आला आहे. पुढील तपास पोलीस करीत आहेत.
