भारतात “या” तारखेपासून सुरू होणार 5G इंटरनेट सेवा
मुंबई,मंडे टू मंडे न्युज वृत्तसेवा। भारतात 1 ऑक्टोबर पासून 5G सेवा सुरू होणार असून, पंतप्रधान नरेंद्र मोदी 1 ऑक्टोबर रोजी इंडिया मोबाइल काँग्रेसमध्ये 5G सेवेचा शुभारंभ करणार आहेत. केंद्राच्या राष्ट्रीय ब्रॉडबँड मिशनने ट्विट करून ही माहिती दिली आहे. प्रगती मैदानावर होणारी ‘इंडिया मोबाईल काँग्रेस’ 4 ऑक्टोबरपर्यंत चालणार आहे.
केंद्रीय दळणवळण, इलेक्ट्रॉनिक्स आणि माहिती तंत्रज्ञान मंत्री अश्विनी वैष्णव यांनी मागील आठवड्यात सांगितले होते की, सरकारने अल्प कालावधीमध्ये राज्यात 5G दूरसंचार सेवांचे 80 टक्के कव्हरेज करण्याचे लक्ष्य ठेवले आहे. पहिल्या टप्प्यात 5G सेवा राज्यातील सुमारे 13 शहरांमध्ये उपलब्ध करून दिली जाण्याची शक्यता आहे. 5G वापरकर्त्यांना 4G पेक्षा 10 पट जास्त इंटरनेट स्पीड मिळेल असे वैष्णव यांनी सांगितले होते. तसेच, 5G सेवेद्वारे निर्माण होणाऱ्या रेडिएशनची पातळी जागतिक आरोग्य संघटनेने (WHO) शिफारस केलेल्या पातळीपेक्षा खूपच कमी असल्याचेही स्पष्ट केले होते.
पहिल्या टप्प्यामध्ये केवळ 13 निवडक शहरांना हायस्पीड 5G इंटरनेट सेवा मिळेल. या शहरांमध्ये दिल्ली, चेन्नई, बेंगळुरू, चंदीगड, अहमदाबाद, गांधीनगर, लखनौ, जामनगर, हैदराबाद, कोलकाता, गुरुग्राम, मुंबई आणि पुणे यांचा समावेश आहे. हे लक्षात घेण्यासारखी बाब म्हणजे वर नमूद केलेल्या या शहरांमधील प्रत्येक नागरिकाला 5G सेवा मिळू शकत नाही. हे शक्य आहे की दूरसंचार कंपन्या या शहरांमधील निवडक भागांमध्ये 5G सुविधा प्रदान करतील ज्याबद्दल अद्याप माहिती देण्यात आलेली नाही.
