मंत्री नवाब मलिक यांना सर्वोच्च न्यायालयाचा दणका
मुंबई,मंडे टू मंडे न्युज वृत्तसेवा। मनी लाँड्रिंग प्रकरणात सक्तवसुली संचालनालयाने केलेल्या अटकेला आव्हान देणारे राष्ट्रवादी काँग्रेसचे नेते नवाब मलिक यांना सर्वोच्च न्यायालयाने झटका देत या प्रकरणात हस्तक्षेप करण्यास नकार दिला आहे. तसेच विशेष म्हणजे नवाब मलिक यांच्या याचिकेवर तातडीने सुनावणी घेण्याची तयारी सर्वोच्च न्यायालयाने दर्शवली होती. तर मलिक यांची बाजू मांडणारे ज्येष्ठ वकील कपिल सिबल यांच्या युक्तिवादाची नोंद घेऊन सरन्यायाधीश एन.व्ही. रमण यांच्या अध्यक्षतेखालील खंडपीठाने या प्रकरणावर तातडीने सुनावणी घेणार असल्याचे स्पष्ट केले होते.
मनी लाँड्रिंग प्रकरणाच्या आरोपाखाली नवाब मलिक यांना २३ फेब्रुवारी रोजी ईडीने अटक केली होती.यानंतर नवाब मलिक यांनी मुंबई उच्च न्यायालयात धाव घेतली. ईडीने दाखल केलेले गुन्हे रद्द करण्याची मागणी नवाब मलिक यांनी याचिकेतून केली होती. तसेच नवाब मलिक यांच्या विरोधात जो गुन्हा दाखल करण्यात आला आहे त्यात काही तथ्य नाही मात्र त्यांचा संबंध अंडरवर्ल्ड सोबत जोडण्याचा प्रयत्न केला जात आहे, त्यांच्यावरील गुन्हे मागे घ्यावे अशी मागणी नवाब मलिकांच्या वकिलांनी केली होती. त्यानंतर मलिकांनी सर्वोच्च न्यायालयात धाव घेत याचिका दाखल केली होती. परंतु आता सर्वोच्च न्यायालयाने सुद्धा ही याचिका फेटाळून लावल्याने नवाब मलिक यांना एक मोठा झटका बसला आहे.
