भावी मुख्यमंत्र्यांच्या यादीत मनसे अध्यक्ष राज ठाकरे, शिवतीर्थासमोर बॅनर झळकले
मुंबई, मंडे टू मंडे न्युज वृत्तसेवा। महाराष्ट्र राज्याचे भावी मुख्यमंत्री कोण असणार यावरून राजकीय वर्तृळात तुफान चर्चा सुरु आहे. गेल्या महिन्यात मुख्यमंत्री पदासाठी अजित पवारांच्या नावाची चर्चा रंगली होती. त्यानंतर प्रत्येक पक्षातील कार्यकर्ते आपापल्या पक्षातील वरिष्ठ नेत्याला भावी मुख्यमंत्री म्हणत बॅनरबाजी करत आहेत. आता या भावी मुख्यमंत्र्यांच्या यादीत मनसे अध्यक्ष राज ठाकरे यांचे नाव देखील घेतले जात आहे.
राज ठाकरे यांच्या निवासस्थानी म्हणजेच मुंबईतील शिवतीर्थासमोर त्यांचे बॅनर लावण्यात आले आहे. या बॅनरवर राज ठाकरे हे महाराष्ट्र राज्याचे भावी मुख्यमंत्री आहेत, असं लिहिण्यात आलं आहे.
राज ठाकरे यांच्या निवासस्थानासमोरच भावी मुख्यमंत्री उल्लेख असलेलं बॅनर लावल्याने राजकीय वर्तुळात एकच चर्चा सुरु आहे. मनसे अध्यक्ष राज ठाकरे यांचा १४ जून रोजी वाढदिवस आहे. त्या पार्श्वभूमीवर कार्यकर्त्यांकडून बॅनरबाजी करण्यात आली आहे. राज्याला एक वेळ मुख्यमंत्री नसला तरी चालेल पण प्रत्येक राज्याला किमान एक तरी राज ठाकरे नक्की असावेत असा उल्लेख या बॅनरमध्ये करण्यात आला आहे.
