सोन्याचा भाव विक्रमीस्तरावर, तर चांदीच्या दरातही मोठी उच्चांकी,भावात आणखी वाढ होणार!
मुंबई,मंडे टू मंडे न्युज वृत्तसेवा। जगभरात आर्थिक मंदीची भीती कायम आहे. त्याचा परिणाम सोन्याच्या किंमतीवर दिसून येत आहे. मध्यंतरी सोन्याचा भाव 50 हजार रुपयांच्या खाली घसरला होता. पण दिवाळीच्या आसपास सोन्याने पुन्हा उसळी मारली. आता तर सोन्याने 56260 रुपये प्रति 10 ग्रॅम हा विक्रम केला आहे. पण तज्ज्ञांच्या मते ही तर सुरुवात आहे. भावात आणखी वाढ होण्याची दाट शक्यता आहे. वायदे बाजारात (MCX) सोन्याने रेकॉर्ड केला आहे. 56191 रुपये प्रति 10 ग्रॅमवर दर पोहचला आहे. आंतरराष्ट्रीय बाजारात सोन्याच्या किंमती वधारल्या आहेत. कॉमेक्सवर सोन्याचा भाव गेल्या 9 महिन्यात उच्चस्तरावर पोहचले आहेत. वर्षभरात सोन्याच्या किंमतीत जवळपास 17% वाढ झाली आहे.
कॉमेक्सवर सोन्याचा भाव 1913 डॉलर प्रति औसपर्यंत पोहचला. तर चांदीची किंमती 24.22 डॉलर प्रति औसवर पोहचले. देशातंर्गत बाजारात चांदीच्या किंमती 9 महिन्यांच्या सर्वात उच्चांकी स्तरावर आहेत. चांदी 69150 रुपये प्रति किलो आहेत. IIFL SEC चे अनुज गुप्ता यांच्या मते, अमेरिकन किरकोळ महागाईच्या आकड्यांनी दिलासा दिला आहे. फेडरल रिझर्व्हने व्याजदरात कपातीचे संकेत दिले नसले तरी आता व्याजदर एकदम वाढणार नाहीत, हे स्पष्ट झाले आहे. डॉलर इंडेक्स 7 महिन्यांच्या निच्चांकी स्तरावर आहेत. त्यामुळे सोन्याच्या किंमती वाढण्याची शक्यता आहे.
सोने आणि चांदीच्या किंमतीत अजून वाढण्याची शक्यता आहे. सोन्याच्या किंमतींना (Gold Price) 55700 आणि 55200 रुपयांचा सपोर्ट मिळाला आहे. त्यामुळे किंमती आणखी वाढण्याची शक्यता आहे. तर चांदीला 67500 आणि 66000 रुपयांचा सपोर्ट मिळाला. चांदी येत्या काळात 72000 रुपये होण्याची शक्यता आहे.
आंतरराष्ट्रीय बाजारात सोन्याच्या किंमतीत वाढ झाली आहे. त्यामुळे केंद्र सरकारने बेस इंपोर्ट प्राईसमध्ये (Base Import Price) वाढ केली आहे. तर चांदीवरील बेस इंपोर्ट प्राईस घटवली. त्याआधारे सोने-चांदी आयात करणाऱ्या मोठ्या व्यापाऱ्यांवर कर आकारण्यात येणार आहे. सोन्याची शुद्धता तपासण्यासाठी एक अ‍ॅप बनवण्यात आले आहे. ‘BIS Care app’ या अ‍ॅपच्या माध्यमातून ग्राहक सोन्याची शुद्धता तपासू शकतात. तसेच या अ‍ॅपच्या मदतीने आपण फक्त सोन्याची शुद्धताच तपासू शकत नाही तर यासंबंधित तक्रारीसुद्धा नोंदवू शकतो.
