कमी दरात चहा, पाववडा विकतो अशी बदनामी केल्याचा संशयातुन तरुणाचा खून
Monday To Monday NewsNetwork।
नाशिक, मंडे टू मंडे वृत्तसेवा: शहरातील आरटीओ कॉर्नर – रासबिहारी लिंक रोड परीसरात चहा टपरीजवळ दुसरी चहाची टपरी लावल्यातून आणि कमी दरात चहा व पाववडा विकतो, अशी बदनामी केल्याच्या संशयावरुन टपरीचालकावर चाकू हल्ला केल्याची धक्कादायक घटना समोर आली आहे. या हल्ल्यात टपरीचालकाचा मृत्यू झाला आहे.
याबाबत सविस्तर असे, तुषार काळे (वय ३६ रा. कळसकर नगर, आरटीवो कॉर्नर, रासबिहारी लिंक रोड, नाशिक) याच्या चहा टपरीजवळ संशयित आकाश काळेने चहा टपरी सुरु केली. त्यातून दोघांमध्ये वाद सुरु झाले. गुरुवारी (दि.२६) सायंकाळी ५ वाजेदरम्यान दोघांमध्ये वाद झाला. कमी दरात चहा व पाववडा विकतो, अशी बदनामी का करतो अशी विचारणा संशयित आकाशने तुषारला केली.
त्यानंतर वादाचे रुपांतर हाणामारीत झाले. राग अनावर झाल्याने आकाशने तुषारच्या डाव्या पायाच्या मांडीवर चाकू हल्ला केला. त्यानंतर आकाश पळून गेला. तुषार गंभीर जखमी झाल्याने त्यास उपचारासाठी खासगी रुग्णालयात दाखल करण्यात आले होते. उपचारादरम्यान तुषारचा मृत्यू झाला. ही बाब पोलिसांना समजताच गुरुवारी रात्री म्हसरूळ पोलीस ठाण्याच्या गुन्हे शोध पथकातील पोलीस नाईक गणेश रेहरे, पोलीस शिपाई दिनेश गुंबाडे, बलदेव राठोड यांनी संशयित आकाश यास राहत्या घराजवळ ताब्यात घेतले.
