कॉलेजबाहेर विद्यार्थ्यावर धारदार शस्त्राने हल्ला : थरार सीसीटीव्ही कॅमेरामध्ये कैद, गुन्हा दाखल !
नाशिक, प्रतिनिधी : शहरात विद्यार्थ्यावर धारदार शस्त्राने वार करण्यात आल्याची धक्कादायक घटना उघडकीस आली आहे. मित्रांसोबत महाविद्यालयाबाहेर गप्पा मारत बसलेला असताना विद्यार्थ्यावर हल्ला करण्यात आला. या घटनेचा संपूर्ण थरार नजीकच्या सीसीटीव्ही कॅमेरामध्ये कैद झाला आहे. भरदिवसा घडलेल्या या प्रकारामुळे एकच खळबळ उडाली आहे.
याबाबत पोलिसांनी दिलेली अधिक माहिती अशी, की फिर्यादी यश नागेंद्र सिंग (वय 18, रा. साई मंगल रो-हाऊस, गजानननगर, पाथर्डी फाटा) हा त्याच्या मित्र-मैत्रिणींसोबत उत्तमनगर कॉलेजसमोर एका बोळीत बोलत होता. त्यावेळी तेथे आलेल्या आरोपींकडे फिर्यादीने पाहिल्याचा राग आला. त्या तिघांनी सिंग याला शिवीगाळ करून येथून निघून जा, असे म्हणाले, तसेच या तिघा अज्ञात इसमांनी फिर्यादीला चाकूसारख्या धारदार शस्त्राने कमरेला, पाठीला व डोक्याला मारून जबर जखमी केले.
याप्रकरणी अंबड पोलीस ठाण्यात भा. दं. वि. कलम 326, 323, 504, 34 प्रमाणे गुन्हा दाखल करण्यात आला असून, पुढील तपास स. पो. नि. शिंदे करीत आहेत.
