भरदिवसा डॉक्टरांच्या घरातून चोरटयांनी लांबविले १५ लाख !
मंडे टू मंडे वृत्तसंकलन।
नाशिक (प्रतिनिधी) : शहरातील कामगारनगर परिसरात राहणाऱ्या एका डॉक्टरांच्या घरावर अज्ञात चोरटयांनी भरदिवसा तिजोरीसह १५ लाख किमतीच्या मुद्देमालावर डल्ला मारल्याची धक्कादायक घटना घडली असून या प्रकरणी सातपूर पोलीस ठाण्यात गुन्हा दाखल करण्यात आला आहे.
पोलिसांना दिलेल्या माहितीनुसार, शहरातील कामगारनगर परिसरात रहिवासी फिर्यादी डॉ. नरेंद्र पाटील हे कामगारनगर मधील मधुरमैत्री या १२ मजली बिल्डिंगच्या चौथ्या मजल्यावर राहतात. दरम्यान, बुधवारी रोजी भरदिवसा दुपारी १ वाजेच्या सुमारास अज्ञात चोरटयांनी डॉ. पाटील यांच्या फ्लॅटचे लॉक तोडून घरात प्रवेश करत कपाटातील तिजोरी तुटत नसल्याने तिजोरीसह चोरटयांनी पलायन केल्याने परिसरात खळबळ उडाली आहे.
दरम्यान, तिजोरीत अंदाजे ८ तोळे सोने व चांदीच्या वस्तू होत्या तर, काही रोख रक्कम असे एकूण १५ लाख रुपयांचा मुद्देमाल होता. या प्रकरणी सातपूर पोलीस ठाण्यात गुन्हा दाखल करण्यात आला असून या प्रकरणाचा पोलीस अधिक तपास करत आहेत.
