हॉटेलमध्ये नेऊन गुंगीचे औषध प्यायला देऊन अल्पवयीन मुलीवर अत्याचार
Monday To Monday NewsNetwork।
नाशिक, प्रतिनिधी : येथील प्रसिद्ध देवस्थान त्र्यंबकेश्‍वर येथे दर्शनासाठी जाण्याच्या बहाण्याने अल्पवयीन मुलीवर त्र्यंबकेश्‍वरजवळील एका हॉटेलमध्ये नेऊन गुंगीचे औषध पाजून तिच्यावर बळजबरीने अत्याचार केल्याची खळबळजनक घटना रविवारी घडली आहे. या प्रकरणातील संशयिताला अटक करण्यात आली आहे.
या घटनेची पंचवटी पोलिसांनी दिलेली अधिक माहिती अशी, की संशयित रोहित आनंद म्हसदे (वय २५, रा. मायको दवाखान्याजवळ, फुलेनगर, पंचवटी) हा व अल्पवयीन मुलीची आई एका दुकानात कामाला आहे. त्याने अल्पवयीन मुलीस उन्नती शाळेजवळून त्र्यंबकेश्‍वर येथे देव दर्शनासाठी घेऊन जाण्याच्या बहाण्याने रविवारी दुपारी १ वाजेच्या सुमारास त्र्यंबकेश्‍वर जवळील एका हॉटेलमध्ये नेले.
हॉटेलमध्ये नेल्यानंतर त्याने कोकाकोलाच्या बाटलीमध्ये गुंगीकारक औषध देऊन अल्पवयीन मुलीवर बळजबरीने अत्याचार केला. या प्रकरणी पंचवटी पोलीस ठाण्यात म्हसदे याच्याविरुद्ध भा. दं. वि. कलम ३७६ , बाललैंगिक अत्याचार संरक्षण (पोस्को) अधिनियम २०१२ चे कलम ४ प्रमाणे गुन्हा दाखल करण्यात आला असून, त्याला अटक करण्यात आली आहे. महिला पोलीस उपनिरीक्षक डी. एस. पाटील अधिक तपास करीत आहेत.
