गॅस गळती झाल्याने सिलेंडरचा स्फोट : ६ जण जखमी
नाशिक, मंडे टू मंडे वृत्तसेवा : पंचवटीतील कुमावतनगर येथे गॅस गळती होऊन आज सकाळी त्याचा स्फोट झाल्यामुळे 6 जण भाजून जखमी झाले आहेत. सर्व जखमींना जिल्हा शासकीय रुग्णालयात उपचारार्थ दाखल करण्यात आले आहे.
याबाबत मिळालेली माहिती अशी की, कुमावतनगरमधील कुमावत यांच्या घरात सहा परप्रांतीय मजुर राहतात. काल रात्री जेवण करून झोपल्यानंतर रात्रभरात कधीतरी गॅस गळती सुरू झाली. मात्र झोपेत समजून आले नाही. सकाळी सात वाजेच्या सुमारास एका सदस्याने गॅस पेटविण्याचा प्रयत्न केला. यावेळी भडका होऊन नवलेेश पाल, संजय मौर्य, विजय पाल, विरेंदर पासवान, अखिलेश पाल, अरविंद पाल (सर्व रा. फत्तेपूर, उत्तरप्रदेश, हल्ली मुक्काम कुमावतनगर, नाशिक) हे सहा जण भाजून जखमी झाले.
अग्निशामक दलाला घटनेची खबर मिळताच सब ऑफिसर अहिरे, वाहनचालक आर.आर. काठे, फायरमन एम.के. सोनवणे, यु.आर. झिटे, आय.ए. पानसरे, यांच्या पथकाने घटनास्थळी धाव घेतली आणि गॅस विझवून जखमींना अधिक उपचारासाठी जिल्हा रुग्णालयात पाठविण्यात आले.
