महसूल अधिकाऱ्यांवर लेटरबॉम्ब फोडणाऱ्या पोलीस आयुक्तांचा माफीनामा
नाशिक,मंडे टू मंडे न्युज वृत्तसेवा। राज्यात महसूल (Revenue Officers) अधिकारी आरडीएक्स, तर भूमाफिया डिटोनेटर आहेत, जसे ‘जिवंत बॉम्ब’ असे म्हणत लेटरबाँब टाकलेल्या खळबळ उडाली असतांना पोलिस आयुक्त दीपक पांडे यांनी आपल्या पत्रावर ठाम असल्याचा पुनरुच्चार करत या भूमिकेमुळे मन दुखावले असल्यास सोमवारी महसूलमंत्री बाळासाहेब थोरात यांची बिनशर्त माफी मागितली आहे.
राज्यात महसूल अधिकारी ‘आरडीएक्स’, तर दंडाधिकारी डिटोनेटर बनत आहेत. त्यामुळे जिवंत बॉम्ब तयार होत आहेत. जिल्ह्यात भूमाफियांनी सर्वसामान्यांची अक्षरशः लूट सुरू केलीय. महसूल अधिकारी त्यांच्या कह्यात आहेत. या भूमाफियांपासून नागरिकांना अभय मिळावे म्हणून महसूल दंडाधिकारी यांचे मुख्य कार्यकारी अधिकार आणि ग्रामीण पोलीस अधीक्षकांचे अधिकार पोलीस आयुक्तांकडे द्यावेत, अशी सनसनाटी मागणी पोलीस महासंचालकांकडे करून थेट महसूल खात्यावर लेटरबॉम्बमधून प्रश्नचिन्ह उपस्थित करणारे नाशिकचे पोलीस आयुक्त दीपक पांडेय यांनी अखेर महसूल मंत्री बाळासाहेब थोरात यांच्याकडे सपशेल माफीनामा मागितल्याचे समोर आले आहे.
आनंदवली परिसरात भूमाफियांनी मिळून जागामालकाचा खून केल्याचे प्रकरण उघडकीस आल्यानंतर याचे गांभीर्य समोर आले होते. तसेच त्यांनी जिल्हा दंडाधिकारी आणि पोलिस आयुक्तांचे कामाचे स्वरूप एकच असल्याने जिल्हा शहर पोलिस आयुक्तालयात सामावून घेण्याचा प्रस्तावही सादर केला होता. महसूलचे सर्व अधिकार स्वतःकडे मागणाऱ्या पोलीस आयुक्तांच्या पत्रामुळे महसूल मंत्री बाळासाहेब थोरात यांचा संताप अनावर झाला. विशेषतः या पत्रातील गंभीर भाषेची थोरात यांनी दखल घेत थेट मुख्यमंत्र्यांकडे तक्रार करण्याचा इशारा दिला होता. पोलीस आयुक्त दीपक पांडेय यांच्या सनसनाटी पत्रावर महसूल मंत्री बाळासाहेब थोरात यांनी तीव्र शब्दांत नाराजी व्यक्त केल्याची माहिती सूत्रांनी दिली. महसूल मंत्री म्हणाले की, कामकाजात सुधारणा करण्यासाठी एखाद्या अधिकाऱ्याने शिफारशी केल्या, तर त्याचे केव्हाही स्वागत आहे.
मात्र, महसूल अधिकाऱ्यांना आणि या विभागाला थेट आरोपीच्या पिंजऱ्यात उभे करणे त्यांना रुचले नाही. याच पद्धतीने पोलीस विभागाचे मूल्यमापनही करता येते. सध्या मुंबईचे माजी पोलीस आयुक्त परमबीरसिंह जामिनावर आहेत. एन्काउंटर स्पेशालिस्ट तुरुंगात आहेत. पुण्यात पोलिसांनी व्यापाऱ्यांचे अपहरण करून खंडणी मागितलीय. बीटकॉईन घोटाळ्यात पोलीस अधिकारी सहभागी आहेत. पोलिसांनी आधी आपल्या विभागाकडे लक्ष द्यावे. वाळू, रेशनधान्य, भेसळयुक्त अन्नपदार्थ, परमीट रूम, हातभट्टीची दारू याचे काय होते, हे उभ्या महाराष्ट्राला ठाऊक आहे, अशा शब्दांत महसूल मंत्र्यांनी ताशेरे ओढल्याचे समजते.
