अल-कायदाच्या भारतातील सर्वात मोठ्या नेटवर्कचा पर्दाफाश; ९ दहशतवादी ताब्यात
नवी दिल्ली (वृत्तसंस्था): देशातील विविध राज्यांमध्ये सुरू असलेल्या अल-कायदाच्या मॉड्यूलला धक्का देण्यात राष्ट्रीय तपास यंत्रणेला (National Investigation Agency) मोठ यश मिळालं आहे. देशातील विविध राज्यात अल-कायदाचं जाळं असल्याची माहिती मिळताच अशा भागात धाड टाकण्यात आली आहे. यानंतर अल-कायदाच्या कार्यकर्त्यांना अटक करण्यात आली आहे.
दहशतवाद्यांविरोधात आणखीन एक मोठी कारवाई करण्यात पोलिसांना यश आलं आहे. शनिवारी पहाटे केरळमधील एर्नाकुलम आणि पश्चिम बंगालमधील मुर्शिदाबाद इथे अनेक ठिकाणी छापेमारी कऱण्यात आली. या छापेमारीदरम्यान पाकिस्तान पुरस्कृत असलेल्या अल-कायद्यासाठी काम करणाऱ्या ९ दहशतवाद्यांना अटक करण्यात आली आहे.
मुर्शिदाबाद, एर्नाकुलम येथे एनआयएने टाकलेल्या छाप्यात ९ जणांना अटक करण्यात आली आहे. यामुळे जगातील सर्वात मोठी दहशतवादी संघटना असलेल्या अल-कायदाची भारतातील पाळेमुळे खणून काढली आहे. अलकायदा मॉड्यूलला तोडण्यात आलं असून अलकायद्याच्या दहशतवाद्यांना अटक करण्यात आली आहे. हे राष्ट्रीय तपास यंत्रणेला मिळालेलं मोठं यश आले. देशात सध्या चीन व पाकिस्तानसोबत सीमेवर तणाव सुरू आहे. अलकायद्यांच्या दहशतवाद्यांना अटक केल्यानंतर देशातील इतर भागात यासंदर्भात काही प्रयत्न सुरू असल्यास त्यावर त्वरीत कारवाई करता येऊ शकणार आहे.
