निंभोरा- वाघोदा रस्ता देतोय अपघाताला आमंत्रण
खिर्डी ता.रावेर,मंडे टू मंडे न्युज प्रतिनिधी। तालुक्यातील निंभोरा ते वाघोदा जाणारा डांबरी रस्ता वाहन धारकांकरीता धोकादायक ठरत आहे.याचे मुख्य कारण म्हणजे या डांबरी रस्त्यावर ठिकठिकाणी मोठ मोठे खड्डे पडलेले आहे. त्यामुळे वाहनधारकांना या रस्त्यावरून ये जा करण्याकरिता तारेवरची कसरत करावी लागत आहे.
तसेच निंभोरा येथील मराठी मुलांच्या शाळे पासून ते थेट वाघोदा येथील शनी मंदिर पर्यंत डांबरी रस्ता हा पूर्णतः खड्डेमय झाल्याने या खड्डयामधील गिट्टी व माती ही बाहेर निघालेली आहे. त्यामुळे दुचाकी अनियंत्रित होवून या रस्त्यावर किरकोळ स्वरूपाचे अपघात होत असतात.तसेच सध्या पावसाचे दिवस सुरु असल्याने या रस्त्यावर पडलेल्या खड्डयांमध्ये पाणी साचलेले असते.त्यामुळे रस्त्याची बारीक गिट्टी व माती निघाल्यामुळे मोटर सायकल स्लीप होवून अपघात होण्याचे हेच मुख्य कारण ठरत आहे.तसेच या रस्त्यावर मोठ्या प्रमाणावर रहदारी असल्याने या रस्त्यावरून ट्रक, बस, चार चाकी तसेच दुचाकी वाहने नेहमीच ये जा करीत असतात. मात्र या खड्यांमुळे मोठा अपघात होण्याची शक्यता नाकारता येत नाही. त्यामुळे संबंधित विभागाने याकडे लक्ष देऊन या रस्त्यावरील त्वरित खड्डे बुजविण्यात यावे अशी मागणी परिसरातील वाहन चालकांसह सुज्ञ नागरिकांनी केलेली आहे.
