खिर्डी येथील नवीन गावठाण भागातील रस्त्यावर सांडपाण्याचे डबके, प्रशासनाचे दुर्लक्ष
खिर्डी ता.रावेर,मंडे टू मंडे न्युज, भिमराव कोचुरे। खिर्डी खु.येथील नवीन गावठाण भागात असलेल्या पाण्याच्या टाकी जवळ खूप मोठ्या प्रमाणात घाणीचे साम्राज्य असूनही ग्रामपंचायत प्रशासन जाणून बुजून दुर्लक्ष करीत आहे.तसेच गेली कित्येक वर्षापासून गटारी नसल्यामुळे पाण्याच्या व्हाल जवळ नेहमी पाण्याचे डबके साचत राहते.
तसेच पाण्याच्या टाकी जवळच बंद अवस्थेत असलेले शौचालय असल्यामुळे तेथील सेप्टिक टाकीवरचे झाकण गायब झाल्यामुळे सदरील टाकीचे दुर्गंधीयुक्त घाणपाणी वाहत असल्याने एखाद्या वेळेस व्हाल नादुरुस्त झाल्यास संपूर्ण गावाला दूषित पाणी पुरवठा झाल्यास नागरिकांचे आरोग्य धोक्यात येण्याची दाट शक्यता असूनही या सर्व गंभीर प्रकाराकडे ग्राम पंचायत प्रशासन बघ्याची भूमिका घेत असल्याचे चित्र दिसून येत आहे.या सर्व प्रकाराला जबाबदार कोण ? असा प्रश्न निर्माण झाला आहे.
तसेच दुर्गंधी युक्त सांडपाणी गावांतर्गत रस्त्यावर पाणी साचत असल्यामुळे या भागातील रहिवाशांना रात्री बेरात्री घाण पाण्यातून येजा करावी लागत आहे.तसेच सदर ठिकाणी डासांची उत्पत्ती करिता पोषक वातावरण निर्माण झाल्यामुळे मोठ्या प्रमाणात डासांचा प्रादुर्भाव वाढत असल्याने ग्रामपंचायत प्रशासनाने त्वरित याकडे लक्ष देवून योग्य ती उपाय योजना करावी अशी मागणी ग्रामस्थांनी केली आहे.
