राज्यसभेच्या १२ जागांसाठी निवडणूक घोषित, महाराष्ट्रातील २ जागांचा समावेश
नवी दिल्ली, मंडे टू मंडे न्युज नेटवर्क l देशात लोकसभा निवडणुकीनंतर राज्यात विधानपरिषदेच्या निवडणुका पार पडल्या. आता पुन्हा राज्यसभेच्या १२ जागांसाठी निवडणुकीचा कार्यक्रम घोषित करण्यात आला आहे. त्यात २ जागा या महाराष्ट्रातील आहेत.
काही राज्यसभेचे खासदार हे लोकसभेवर निवडून आले आहेत. त्या जागा रिक्त झाल्याने निवडणूक आयोगाने त्या जागी निवडणुका जाहीर केल्या आहेत. या १२ जागां पैकी छत्रपती उदयनराजे भोसले,सातारा व पियूष गोयल मुंबई या दोन जागा महाराष्ट्रातील आहेत. हे दोघेही राज्यसभेचे सदस्य लोकसभेवर निवडून गेले आहेत.
निवडणूक आयोगाने जाहीर केलेल्या कार्यक्रमानुसार उमेदवारी अर्ज दाखल करण्याची १४ ते २१ ऑगस्ट पर्यंत मुदत, तर २६ ॲागस्टला अर्ज माघारी घेण्याची अंतीम तारीख आहे. तर ३ सप्टेंबर रोजी मतदान व मतमोजणी होणार आहे.
