भरदाव वाहनांचा भीषण अपघात : तीन जण जागीच ठार !
चाळीसगाव, मंडे टू मंडे वृत्तसेवा : मजुरांना घेऊन येणारे भरधाव वाहन उलटल्याने तीन जण जागीच ठार झाले असून सहा जण जखमी झाल्याची घटना नांदगाव रस्त्यावरील हिरापूर (ता. चाळीसगाव) गावाजवळ बुधवारी (ता.१) रात्री अकराच्या सुमारास घडली. या अपघातात जखमी झालेल्या दोघांची प्रकृती चिंताजनक असून त्यांना प्राथमिक उपचारासाठी रुग्णालयात दाखल करण्यात आले आहे.
याबाबत अधिक माहिती अशी की, डोंगरगाव (ता. पाचोरा) येथील काही मजूर कामानिमित्त मनमाड गेलेले होते. क्रूझर गाडीने (क्रं. एमएच १३ एसी ५६०४) घरी डोंगरगावला परत येत असताना रात्री चाळीसगाव- नांदगाव रस्त्यावरील हिरापूर गावाजवळ क्रूझर भरधाव वेगात असल्याने अचानक घसरली. गाडी वेगात असल्याने रस्त्यावर आदळून झालेल्या अपघातात गाडीतील ३ जण जागीच ठार झाले. तसेच हा अपघात इतका भीषण होता, की गाडीतील सर्वच्या सर्व मजूर गंभीर जखमी झाले असून यातील दोघांची प्रकृती चिंताजनक असल्याची माहिती समोर आली आहे.
दरम्यान या अपघाताची माहिती मिळताच चाळीसगावचे आमदार मंगेश चव्हाण आणि कार्यकर्त्यांनी तातडीने मदत करून रुग्णांना रुग्णालयात दाखल केले. तसेच त्यानंतर आमदार चव्हाण यांनी ग्रामीण रुग्णालयात जाऊन जखमींवर उपचार करण्यासंदर्भात डॉक्टरांना सूचना केल्या.
