अज्ञात वाहनांची दुचाकीला धडक : पतीचा मृत्यू, पत्नी गंभीर जखमी !
फैजपूर, मंडे टू मंडे न्यूज वृत्तसेवा : येथून जवळ असलेल्या आमोदा गावाजवळील मोर नदीच्या पुलावर आज सकाळच्या सुमारास अज्ञान वाहनाने दिलेल्या धडकेत दुचाकीस्वार पती जागीच ठार झाला असून त्यांची पत्नी गंभीर जखमी झाल्याची घटना घडली आहे. जखमी महिलेस रुग्णालयात दाखल करण्यात आले आहे.
आमोदा भिकनगाव महामार्गावरून भुसावळ येथून मुंजलवाडी येथे गोपाळ कडू सोनवणे (वय-५५) रा. मुंजलवाडी ता. रावेर हे त्यांची पत्नी अनिता गोपाळ सोनवणे यांच्यासह दुचाकीने बुधवारी २० एप्रिल रोजी जात असतांना सकाळी १० वाजेच्या सुमारास यावल तालुक्यातील आमोदा गावाजवळील मोर नदीच्या पुलावर त्यांना अज्ञात वाहनाने जोरदार धडक दिली. या धडकेत गोपाळ सोनवणे हे जागीच ठार झाले तर त्यांची पत्नी अनिता सोनवणे ह्या गंभीर जखमी झाल्या आहे.
सदरील महिला जखमी झाल्याने तातडीने यावल ग्रामीण रूग्णालयात उपचारार्थ दाखल करण्यात आले आहे. अपघातातची माहिती मिळताच फैजपूर पोलीसांनी घटनास्थळी धाव घेतली होती. यावल ग्रामीण रूग्णालयात शवविच्छेदन करून मृतदेह नातेवाईकांच्या ताब्यात देण्यात आला. या घटनेमुळे मुंजलवाडी गावात हळहळ व्यक्त होत आहे.
