यावल तालुक्यातील महिला महसूल ग्राम अधिकार्‍याचा विनयभंग, पोलीस पाटला विरोधात गुन्हा
फैजपूर, मंडे टु मंडे न्युज नेटवर्क | यावल तालुक्यातील पोलीस पाटलाने एका ३३ वर्षीय महिला ग्राम महसूल अधिकाऱ्याचा विनयभंग केल्याची घटना घडली असून या संदर्भात फैजपूर पोलिस स्टेशनमध्ये पोलिस पाटलावर गुन्हा दाखल करण्यात आला आहे.
या संदर्भात मिळालेली अधिक माहिती अशी की, यावल तालुक्यातील बामणोद – अकलूद रस्त्यादरम्यान यावल तालुक्यातील भोरटेक, येथील पोलीस पाटील धनराज गोंडू कोळी यांनी ३३ वर्षीय महिला ग्राम महसूल अधिकारी शासकीय काम करत असतांना अटकाव करून त्यांच्या मनाला लज्जा उत्पन्न होईल असे कृत्य केले. या प्रकरणी फिर्याद दिल्यावर सोमवारी रात्री उशिरा पोलीस पाटलाविरुद्ध ३३ वर्षीय महिला ग्राम महसूल अधिकारी यांच्या फिर्यादीवरून विनयभंग सह विविध कलमान्वये गुन्हा दाखल करण्यात आला आहे. तसेच तहसीलदारांनी पोलीस पाटील यांच्या निलंबनाचा प्रस्ताव देखील प्रांताकडे सादर केला आहे.
३३ वर्षीय महिला ग्राम महसूल अधिकारी यांनी दिलेल्या फिर्यादीनुसार १३ फेब्रुवारी २०२५ पासून ते ७ एप्रिल २०२५ या कालावधी दरम्यान सदर महिला अधिकारी या बामणोद ते अकलूद या रस्त्याने जात असतांना भोरटेक या गावाचे पोलीस पाटील धनराज कोळी याने सतत त्यांचा पाठलाग केला. त्यानंतर त्या कार्यालयात जात असतांना कार्यालयात येऊन त्यांच्या शासकीय कामात सतत अडथळा निर्माण करत मनाला लज्जा उत्पन्न होईल असे कृत्य तो करत असे. पोलिस पाटील धनराज कोळी यांच्या सततच्या कृत्या ला त्रस्त होऊन त्यांनी वरिष्ठांना याबाबत माहिती दिली आणि वरिष्ठांनी या प्रकाराची गंभीर दाखल घेत पोलिस पाटील धनराज कोळी यांचे विरोधात फैजपूर पोलीस ठाण्यात तक्रार दाखल करण्याच्या सूचना दिल्या.
महिला अधिकारी यांनी फैजपूर पोलीस ठाण्यात पोलीस पाटील धनराज कोळी याच्याविरुद्ध तक्रार दिल्याने विनयभंग सह विविध कलमान्वय गुन्हा दाखल करण्यात आला असून पुढील तपास साहायक पोलीस निरीक्षक रामेश्वर मोताळे यांच्या मार्गदर्शनाखाली हवलदार मोती पवार करीत आहे.
