दोन दुचाकींची सामोरा समोर टक्कर,जखमीच्या नातेवाईकात हाणामारी
Monday To Monday NewsNetwork।
यावल (प्रतिनिधी)। तालुक्यातील भुसावल यावल रस्त्यावरील निमगावजवळ दोन दुचाकींची धडक होऊन त्यात चार जण जखमी झाले. जखमींना येथील ग्रामीण रुग्णालयात आणले असता याठिकाणी जखमींच्या नातेवाइकांनी दोन गटात आपसातच हाणामारी झाली. रुग्णालयात पोलिसांसमोरच हाणामारी करणाऱ्या २० जणांना ताब्यात घेण्यात आले आहे तर यात जखमींना जळगावात हलविण्यात आले आहे.
आज रविवारी ता. ९ दुपारी बाराच्या सुमारास यावल – भुसावळ रस्त्यावर निमगाव जवळ सुजित उत्तम पाटील वय १८ व रोहन संजय अहिरे वय १८ दोघे रा. निमगाव हे शेतातून दुचाकीवर घरी येत होते. तर इमामरजा खान समीर खान वय २० व अहमदरजा खान फिरोज खान वय २० दोघे रा. सईदपुरा, यावल हे भुसावळकडून यावलकडे येत होते. या वेळी या दोन्ही दुचाकींची समोरासमोर धडक झाली. यामध्ये हे चौघे जखमी झाले. जखमींना तातडीने यावल ग्रामीण रुग्णालयात आणण्यात आले. या ठिकाणी डॉ. शुभम तिडके, अधिपरिचारिका मंजूषा कोळेकर, भूषण गाजरे यांनी उपचार केले. दरम्यान, रुग्णालयात आलेल्या जखमींच्या नातेवाईकांमध्ये आपसात ‘तू तू- मै मै’ होत त्याचे रूपांतर हाणामारीत झाले. हाणामारी करणाऱ्या दोन्ही गटातील २० जणांना पोलिसांनी ताब्यात घेतले. त्यांच्याविरुद्ध फौजदारी स्वरूपाचा गुन्हा दाखल करण्यात आला आहे.
