लग्न आटोपून परततांना अज्ञात वाहनाच्या धडकेत पत्नीचा मृत्यू पती जखमी
मंडे टू मंडे वृत्तसंकलन।
जळगाव (प्रतिनिधी): लग्न समारंभ आटोपून भुसावळ वरून जळगावच्या दिशेने दुचाकीने परत येणा-या दाम्पत्यावर आज सायंकाळी काळाने झडप घातली. जळगाव येथील प्रभात कॉलनी परिसरात राहणारे लीना तळेले व त्यांचे पती किशोर तळेले हे दाम्पत्य भुसावळ येथे लग्नसमारंभात गेले होते. लग्नकार्य आटोपून ते जळगावच्या दिशेने दुचाकीने परत येत होते.
दरम्यान महामार्गावरील रिलायन्स पेट्रोल पंपानजीक सायंकाळी सव्वा पाच वाजेच्या सुमारास अज्ञात वाहनाच्या जोरदार धडकेत दोघे दाम्पत्य जोरात फेकले गेले. या अपघातात लिना तळेले या ठार झाल्या. त्यांचे पती किशोर तळेले हे गंभीर जखमी झाले आहेत. या घटनेची माहिती मिळताच घटनास्थळी एमआयडीसी पोलिस स्टेशनचे कर्मचारी तात्काळ हजर झाले. मयत लिना तळेले यांचा मृतदेह लागलीच सामान्य रुग्णालयात नेण्याची व्यवस्था करण्यात आली असून धडक देणा-या अज्ञात वाहनाचा शोध घेतला जात आहे, या प्रकरणी पुढील कारवाई पोलिस उपनिरीक्षक विशाल वाठोरे व सचिन मुंडे करत आहे.
