कोरोनाचा संसर्ग ‘या’ कारणामुळे नऊ पट वेगाने पसरतोय
करोना संसर्गाच्या बाधितांच्या संख्येत सातत्याने वाढ होत आहे. अमेरिकेतही मागील काही दिवसांत मोठ्या प्रमाणावर वाढ झाली आहे. करोनाबाधितांच्या संख्येत वाढ होण्यामागील कारण समोर आले आहे. जगभरात करोनाबाधितांच्या संख्येत सातत्याने वाढ होत आहे. अमेरिका आणि ब्राझीलमध्ये करोनाबाधितांची संख्या लक्षणीयरीत्या वाढली आहे. करोनाबाधितांच्या वाढत्या संख्येमुळे अनेकजण चक्रावले असून वैज्ञानिकांनी यामागील सांगितलेले कारण धक्कादायक आहे. करोनाच्या विषाणूने आपले रुप बदलले असून त्यामुळेच बाधितांच्या संख्येत वाढ होत असल्याचा दावा करण्यात आला आहे.
आंतरराष्ट्रीय विज्ञानविषयक नियतकालिक सेल मध्ये हे संशोधन प्रकाशित झाले आहे. करोनाने आपले रुप बदलल्यामुळे अमेरिका, युरोपसह जगभरात बाधितांच्या संख्येत वाढ झाली असल्याचा दावा करण्यात आला आहे. मात्र, पूर्वीच्या तुलनेत करोना विषाणूमुळे मृत्यू होण्याचा धोका कमी झाला असल्याचे संशोधकांनी म्हटले आहे. अमेरिकेतील लॉस अलामॉस नॅशनल लॅबोरेटरीने केलेल्या संशोधनाचे प्रमुख बेट कोर्बर यांनी सांगितले की, कोविड-१९ च्या विषाणूमध्ये रुप बदलण्याची (म्युटेशन) क्षमता आहे. एप्रिलच्या सुरुवातीला विषाणूमध्ये बदल होत असल्याचे समोर आले होते. विषाणू्च्या ‘डी६१४’मध्ये आश्चर्यपणे बदल होत असल्याचे समोर आले असल्याचे त्यांनी सांगितले. त्या आधारे वैज्ञानिकांनी विषाणूंच्या अनुवांशिक क्रमांची तपासणी केली.
कॅलिफोर्नियातील ला जोला इंस्टिट्युट फॉर इम्युनोलॉजी आणि एरोनोव्हायरस इम्युनोथेरेपी कंसोर्टियच्या एरिका ओल्मन सेफायर यांनी सांगितले की, सध्या जगात बहुतांशी करोनाबाधित हे जी६१४ या विषाणूशी बाधित आहे. करोनाचे हे स्वरूप डी६१४ च्या तुलनेत तीन ते नऊ पटीने अधिक वेगाने संसर्ग पसरवतो. मार्च महिन्याच्या सुरुवातीला युरोपमध्ये हा विषाणू होता आणि मार्च महिना अखेरीसपर्यंत अमेरिकेत दाखल झाला. करोनाच्या विषाणूने स्वरूप बदलल्यामुळे प्रोटीन स्पाइकवरही त्याचा परिणाम झाला आहे. स्पाइकच्या संरचनेचा वापर करून विषाणू मानवाच्या पेशीत प्रवेश करतात. स्वरुपात बदल केल्यामुळे करोनाचा संसर्ग फैलावत आहे. विषाणूचा हे रुप जी६१४ करोनाबाधित रुग्णांच्या श्वसननलिकेतील वरील भागात हल्ला करतो. त्यामुळे हा विषाणू नाक, डोळे आणि गळ्यातील भागात विषाणू आपली संख्या वाढवतो.
ड्युक विद्यापीठाच्या संशोधकांनी बर्लिनच्या रुग्णालयात दाखल असलेल्या एक हजार करोनाबाधितांचा अभ्यास केला. त्यांनी केलेल्या अभ्यासानुसार, करोनाचे नवीन स्वरूप जुन्या स्वरुपापेक्षा कमी धोकादायक आहे. करोनावर विकसित होणारी लस जी ६१४ ला नष्ट करण्यात प्रभावी असेल अशी संशोधकांना अपेक्षा आहे. सध्या सुरू असलेल्या संशोधनात करोना विषाणूच्या मूळ स्वरुपातील प्रोटीन स्पाइक घेण्यात आले आहे.
