कोरोनाचं औषध महाराष्ट्राकडे रवाना; किंमत मात्र तब्बल….
वृत्तसंस्था नवी दिल्ली:
करोनाविरोधात लढा देण्यासाठी अत्यंत आशादायी म्हणून पाहिलं जात असलेल्या रेमडेसिव्हिर या औषधाच्या २० हजार बाटल्या पाच राज्यांना पाठवल्या आल्या आहेत, ज्यात महाराष्ट्राचाही समावेश आहे. करोना विषाणूवरील ‘रेमडेसिव्हिर’ या प्रायोगिक औषधाच्या वीस हजार लहान बाटल्या महाराष्ट्र व दिल्लीसह पाच राज्यांना पाठवण्यात आल्या आहेत. गुजरात, तमिळनाडू आणि तेलंगण या राज्यांनाही या औषधाचा पुरवठा होणार आहे. भारतामध्ये या औषधासाठी कोव्हिफोर हे नाव निश्चित करण्यात आले आहे.
करोना विषाणूवरील ‘रेमडेसिव्हिर’ या प्रायोगिक औषधाचे उत्पादन करण्याची परवानगी हैदराबादस्थित हिटेरो या औषधनिर्माण कंपनीला मिळाली आहे. या औषधाच्या १०० मिलिग्रॅम बाटलीची किंमत ५,४०० रुपये इतकी असेल, अशी माहिती हिटेरो कंपनीने दिली. प्रौढांसाठी या औषधाची मात्रा पहिल्या दिवशी २०० मिलिग्रॅम, तर त्यानंतरचे पाच दिवस दररोज १०० मिलिग्रॅम इतका असेल. दुसऱ्या टप्प्यामध्ये हे औषध कोलकाता, इंदूर, भोपाळ, लखनौ, पाटणा, भुवनेश्वर, रांची, विजयवाडा, कोची, त्रिवेंद्रम आणि गोवा या ठिकाणी पोहचवण्यात येणार आहे.
पुढील तीन ते चार आठवड्यांमध्ये या औषधाच्या एक लाख कुपी निर्माण करण्याचे लक्ष्य कंपनीने बाळगले आहे. सध्या या औषधाची विक्री किरकोळ स्वरूपात उपलब्ध नसून केवळ सरकार आणि हॉस्पिटलमार्फत हे औषध उपलब्ध करून देण्यात येत असल्याची माहिती हिटेरोचे व्यवस्थापकीय संचालक वामसी कृष्णा बांदी यांनी दिली. यकृताचे व मूत्रपिंडाचे विकार असणारे रुग्ण, गर्भवती व स्तनपान देणाऱ्या महिला; तसेच १२ वर्षांखालील मुलांना हे औषध देता येणार नसल्याचेही बांदी यांनी सांगितले. दरम्यान, ‘रेमडेसिव्हिर’या औषधाच्या निर्मितीसाठी सिप्ला या भारतीय कंपनीनेही अमेरिकास्थित जायलिड सायन्सेस आयएनसी या मूळ उत्पादक कंपनीशी परवान्यासंबंधीचा करार केला आहे. आपले औषध हे ५,००० रुपयांपेक्षा कमी किमतीत उपलब्ध होईल, असे सिप्लाने म्हटले आहे.
केंद्रीय पथक पाहणीसाठी पुन्हा येणार
महाराष्ट्र, गुजरात आणि तेलंगण राज्यात करोना विषाणूचा वाढता प्रकोप पाहता केंद्र सरकारने या राज्यामध्ये विशेष पथकांची पाठवण्याचा निर्णय घेतला आहे. केंद्रीय आरोग्य मंत्रालयाचे संयुक्त सचिव लव अग्रवाल यांच्या नेतृत्वात हे पथक राज्यांचा दौरा करेल. २६ जून ते २९ जून या कलावधीत हे पथक राज्याच्या अधिकाऱ्यांशी चर्चा करील; तसेच त्यांच्याशी समन्वय साधून करोनाचा प्रसार रोखण्याच्या प्रयत्नांना चालना देईल, असे सांगण्यात आले आहे.
बातम्यांच्या अपडेट मिळवण्यासाठी आम्हाला फॉलो करा
